പുല്‍പ്പള്ളി: മകന്‍ അച്ഛനെ പൂര്‍ണ നഗ്നനായി വൈദ്യുതി പോസ്റ്റില്‍ കെട്ടിയിട്ടു മര്‍ദിച്ചു. ചേകാടി ചമ്പക്കുളം ദേവസ്യ (60) യെയാണ് ഇന്നലെ വൈകിട്ട് മൂന്നോടെ ചേകാടി പാലത്തിനടുത്തുള്ള വൈദ്യുതി പോസ്റ്റില്‍ കെട്ടിയിട്ട് മകന്‍ ജോഷി(34) മര്‍ദിച്ചത്. പോസ്റ്റില്‍ കെട്ടിയിട്ട് പൂര്‍ണ നഗ്നനാക്കി ക്രൂരമായി മര്‍ദിക്കുകയായിരുന്നു. അക്രമാസക്തനായ പ്രതി സമീപത്തേക്ക് ആരെയും അടുപ്പിച്ചില്ല. നാട്ടുകാര്‍ വിവരം അറിയിച്ചതിനെ തുടര്‍ന്ന് പുല്‍പ്പള്ളി എസ്.ഐ മാത്യൂസിന്റെ നേതൃത്വത്തിലുള്ള സംഘം സ്ഥലത്തെത്തി ബലപ്രയോഗത്തിലൂടെ ജോഷിയെ കീഴടക്കി ദേവസ്യയെ രക്ഷിക്കുകയായിരുന്നു. ഒരു മാസം മുമ്പ് ദേവസ്യയുടെ ദേഹത്ത് ജോഷി കരി ഓയില്‍ ഒഴിച്ച് മര്‍ദിച്ച് അവശനാക്കിയിരുന്നു. തുടര്‍ന്ന് പുല്‍പ്പള്ളി പൊലീസ് പ്രതിയെ അറസ്റ്റ് ചെയ്തിരുന്നു. പ്രതിക്ക് മാനസിക അസ്വാസ്ഥ്യമുള്ളതായി സംശയിക്കുന്നു. പിതാവിനെ കെട്ടിയിട്ട സംഭവവുമായി ബന്ധപ്പെട്ട് ജോഷിക്കെതിരെ പൊലിസ് കേസെടുത്തിട്ടുണ്ട്.