കോയമ്പത്തൂര്‍:  അരിയല്ലൂരിനടുത്ത ജയകൊണ്ടത്തില്‍ ഗുഡ്‌സ് ഓട്ടോറിക്ഷയും ലോറിയും കൂട്ടിയിടിച്ച്  ഓട്ടോറിക്ഷയില്‍ സഞ്ചരിച്ച 15 പേര്‍ മരിച്ചു. 10 പേര്‍ക്ക് ഗുരുതരമായ പരുക്കുണ്ട്. ജയകൊണ്ടത്തിലെ  കച്ചിപെരുമാള്‍ ബസ് സ്റ്റാന്റിലാണ് സംഭവം.


മരണവീട്ടിലെ ഏഴാം ദിവസത്തെ ചടങ്ങില്‍ പങ്കെടുക്കാന്‍  ഗുഡ്‌സ് ഓട്ടോറിക്ഷയില്‍ പോകുകയായിരുന്ന ഗ്രാമീണരാണ് അപകടത്തില്‍പെട്ടത്. രാജകുമാരി  (35), കാശിയമ്മാള്‍ (55), കാമാക്ഷി (45), ഓട്ടോ ഡ്രൈവര്‍ മണികണ്ഠന്‍ (35), മുയമ്മാള്‍  (60), മരുതപാണ്ടി (32), റാണി (30), ചിത്ര (28), ചെന്താമര (50), സരസ്വതി (50),  ഹംസവല്ലി (40) ഉള്‍പ്പെടെ 15 പേരാണ് മരിച്ചത്. ഗുരുതരമായി പരുക്കേറ്റ 10 പേരെ തഞ്ചാവൂര്‍  മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. മരിച്ചവരുടെ കുടുംബത്തിനു ഒരു ലക്ഷം രൂപ  വീതം തമിഴ്‌നാട് സര്‍ക്കാര്‍ ധനസഹായം പ്രഖ്യാപിച്ചു.