കാസര്‍കോട്: 20 ദിവസം മുമ്പ് കര്‍ണാടകയിലെ ഹുബ്ലിയില്‍ നിന്നു കാണാതായ 17കാരിയെ ചെര്‍ക്കളയില്‍ കണ്ടെത്തി. പെണ്‍കുട്ടിയെ തട്ടിക്കൊണ്ടു വന്നതായി സംശയിക്കുന്ന ഹുബ്ലി താരിഹാള്‍ സ്വദേശി വിശ്വനാഥ(20)നെ പൊലിസ് കസ്റ്റഡിയിലെടുത്തു. കര്‍ണാടക സ്വദേശികളായ തൊഴിലാളികള്‍ താമസിക്കുന്ന ചെര്‍ക്കളയിലെ ക്വാര്‍ട്ടേഴ്‌സിലാണു പെണ്‍കുട്ടിയെ കണ്ടെത്തിയത്. പെണ്‍കുട്ടിയെ കാണാതായതു സംബന്ധിച്ച് കര്‍ണാടക പൊലിസ് ഊര്‍ജ്ജിതമായി അന്വേഷിച്ചു വരികയായിരുന്നു.
പ്ലസ് ടു വരെ പഠിച്ച വിശ്വനാഥ പിന്നീടു കൂലിപ്പണി ചെയ്തുവരികയായിരുന്നു. അതിനിടെ പരിചയപ്പെട്ട 17കാരിയെ പ്രണയം നടിച്ചു കൂട്ടിക്കൊണ്ടു പോവുകയായിരുന്നു. സൈബര്‍ സെല്ലിന്റെ സഹായത്തോടെ നടത്തിയ അന്വേഷണത്തില്‍ ചെര്‍ക്കള ടവര്‍ ലൊക്കേഷനു കീഴില്‍ പെണ്‍കുട്ടി ഉള്ളതായി മനസിലായതിനെ തുടര്‍ന്നു കാസര്‍കോട് ജില്ലാ പൊലിസ് മേധാവി തോംസണ്‍ ജോസിന്റെ സഹായം തേടി. കാസര്‍കോട് സി.ഡി പാര്‍ട്ടിയും കര്‍ണാടക പൊലിസും നടത്തിയ തിരച്ചിലിനൊടുവിലാണു ക്വാര്‍ട്ടേഴ്‌സില്‍ ഇരുവരെയും കണ്ടെത്തിയത്.