റിയാദ്: യമനില്‍ നിന്നും സഊദി അതിര്‍ത്തിയിലേക്ക് നുഴഞ്ഞു കയറാന്‍ ശ്രമിച്ച അഞ്ചു ഹൂതികള്‍ കൊലപ്പെടുത്തിയതായി അറബ് സഖ്യ സേന വ്യക്തമാക്കി. യമനിലെ വിവിധ പ്രവിശ്യകളില്‍ കഴിഞ്ഞ ഏതാനും ദിവസങ്ങളായി നടക്കുന്ന ആക്രമണത്തില്‍ നേതാവടക്കം നാല്‍പതു ഹൂതികളെ കൊലപ്പെടുത്തിയതിനു പിന്നാലെയാണ് സഊദിയിലേക്ക് നുഴഞ്ഞു കയറാന്‍ ശ്രമിക്കുകയായിരുന്ന ഹൂതികളെ അതിര്‍ത്തി രക്ഷാ സേന കൊലപ്പെട്ടുത്തിയത്.

യമനില്‍ സഖ്യ സേന നടത്തുന്ന ആക്രമണത്തിന് പ്രതികാരമായിട്ടാണ് സഊദി അതിര്‍ത്തിയിലേക്ക് നുഴഞ്ഞു കയറി പ്രശ്‌നമുണ്ടക്കാന്‍ ഹൂതികള്‍ ശ്രമിക്കുന്നത്. ഹൂതികളെ അമര്‍ച്ച ചെയ്യാനാണ് സഖ്യ സേന സനായിലെ മറ്റു പ്രവിശ്യകളിലെ കഴിഞ്ഞ ദിവസങ്ങളിലായി ആക്രമണം രൂക്ഷമാക്കിയിരിക്കുകയാണ്. കടുത്ത പോരാട്ടത്തിനിനൊടുവില്‍ അല്‍ ജോഫി പ്രവിശ്യയിലെ അല്‍ ഗീല്‍ പ്രദേശവും യമന്‍ ഔദ്യോഗിക സൈന്യം ഹൂതികളില്‍ നിന്നും മോചിപ്പിച്ചു. ഹൂതികളുടെ രണ്ടാമത്തെ ശക്തി കേന്ദ്രമാണിത്. ഏകദേശം 20 ഓളം ഹൂതികള്‍ ഇവിടെ കൊല്ലപ്പെട്ടതായാണ് കണക്കുകള്‍. കൂടാതെ നിരവധി പേരെ അറസ്റ്റു ചെയ്തതായും യമന്‍ സേന പറഞ്ഞു.

അതെ സമയം, ഹൂതികള്‍ ആയുധം താഴെ വെക്കാതെ യമനില്‍ ഇനി യാതൊരു വിധ സമാധാന ചര്‍ച്ചകള്‍ക്കും ഒരുക്കമല്ലെന്നു സഖ്യസേനാ വക്താവ് മേജര്‍ ജനറല്‍ അഹമദ് അല്‍ അസീരി കഴിഞ്ഞ ദിവസം വ്യക്തമാക്കിയിരുന്നു.