കാക്കനാട്: റോഡരികില്‍ സ്ഥാപിച്ചിരിക്കുന്ന ട്രാന്‍സ്‌ഫോര്‍മര്‍ അപകട ഭീഷണി ഉയര്‍ത്തുന്നു. സുരക്ഷിതമായി മാറ്റി സ്ഥാപിക്കണമെന്ന നാട്ടുകാരുടെ ആവശ്യം അധികൃതര്‍ അവഗണിക്കുന്നതായും ആക്ഷേപമുണ്ട്.
കാക്കനാട് അത്താണി കീരേലിമലയിലെ റോഡരികില്‍ സ്ഥാപിച്ചിരിക്കുന്ന ട്രാന്‍സ്‌ഫോമറാണു എത് സമയത്തും അപകട സാധ്യത ഉയര്‍ത്തുന്നത്. രണ്ട് പോസ്റ്റുകളെ ബന്ധിപ്പിച്ചുള്ള ഫ്‌ളാറ്റ്‌ഫോമിലാണ് ഇത് സ്ഥാപിച്ചിരിക്കുന്നത്. നിരവധി കാല്‍നടയാത്രക്കാരാണ് നിത്യേന ഇതുവഴി കടന്നുപോകുന്നത്.
ശ്രദ്ധ തെറ്റി കൈയൊന്നുയര്‍ത്തിയാല്‍ തട്ടാന്‍ തക്കവണ്ണമുള്ള അകലം മാത്രമേ ട്രാന്‍സ്‌ഫോമറിന്റെ ഫീസ് കാരിയറുമായുള്ളു.
ട്രാന്‍സ്‌ഫോര്‍മര്‍ സമീപത്ത സുരക്ഷിത സ്ഥാനത്തേക്ക് മാറ്റി സ്ഥാപിക്കണമെന്ന് സമീപവാസികള്‍ ആവശ്യപ്പെട്ടിട്ടും യാതൊരു നടപടിയുമില്ല. അതുപോലെ കലക്ടറേറ്റ് ബസ് സ്‌റ്റോപ്പിന് മുന്നിലും സുരക്ഷാവേലിയില്ലാത്ത ട്രാന്‍സ്‌ഫോമര്‍ വഴിയാത്രക്കാര്‍ക്ക് ഭീഷണിയാകുന്നുണ്ട്.
രാത്രികാലങ്ങളില്‍ ഇരുചക്രവാഹനയാത്രക്കാരുള്‍പ്പെടെ ട്രാന്‍സ്‌ഫോമറില്‍ ഇടിച്ച് അപകടമുണ്ടാകാന്‍ സാധ്യതയുണ്ട്. അതിനാല്‍ അധികൃതര്‍ അടിയന്തരമായി സുരക്ഷിത സ്ഥാനത്തേക്ക് മാറ്റാന്‍ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.