കേണിച്ചിറ: ഇരുളം ഗവ. ഹൈസ്‌കൂളില്‍ സ്‌നേഹപൂര്‍വം സുപ്രഭാതം പദ്ധതി ആരംഭിച്ചു. ഇരുളം നൂറുല്‍ ഹുദ മദ്‌റസ പി.ടി.എ കമ്മിറ്റിയാണ് സ്‌കൂളിലേക്ക് പത്രം സ്‌പോണ്‍സര്‍ ചെയ്തത്. സ്‌കൂള്‍ ലീഡര്‍ എന്‍.വി ആദിത്യന് പത്രം നല്‍കി മഹല്ല് ഖത്തീബ് ശഹീര്‍ ഫൈസി പദ്ധതി ഉദ്ഘാടനം ചെയ്തു. സ്‌കൂള്‍ പി.ടി.എ പ്രസിഡന്റ് ടി.ആര്‍ രവി അധ്യക്ഷനായി. ജില്ലാ ഓര്‍ഗനൈസര്‍ ഹാരിസ് ബാഖവി കമ്പളക്കാട് പദ്ധതി വിശദീകരിച്ചു. പ്രധാനാധ്യാപിക സി.കെ വിനോദിനി, മഹല്ല് പ്രസിഡന്റ് കെ.യു ഖാദര്‍, മദ്‌റസ പി.ടി.എ സെക്രട്ടറി അബ്ദു ലത്തീഫ്, പി.കെ ഇബ്‌റാഹീം, കെ.എം ഹനീഫ, എസ്.വൈ.എസ് ജില്ലാ സെക്രട്ടറി കെ.എ നാസര്‍ മൗലവി, അധ്യാപകരായ ടി.ആര്‍ സണ്ണി, രാജു സംബന്ധിച്ചു.
1964ല്‍ ആരംഭിച്ച സ്‌കൂള്‍ 1980ലാണ് ഹൈസ്‌കൂളായി അപ്‌ഗ്രേഡ് ചെയ്തത്. 700ഓളം വിദ്യാര്‍ഥികളാണ് ഇന്ന് സ്‌കൂളില്‍ അധ്യയനം നടത്തുന്നത്. കഴിഞ്ഞ അഞ്ച് വര്‍ഷങ്ങളായി എസ്.എസ്.എല്‍.സി പരീക്ഷയില്‍ തുടര്‍ച്ചയായി 100 മേനി വിജയം നേടിയ സ്‌കൂള്‍ കായിക രംഗത്ത് സംസ്ഥാന തലത്തില്‍ പ്രാധിനിധ്യമറിയിച്ചിട്ടുണ്ട്.
എന്‍.എം.എം.എസ്, ഇന്‍സ്‌പെയര്‍ തുടങ്ങിയ പല അവാര്‍ഡുകളും സ്‌കൂളിന്റെ പ്രവര്‍ത്തന മികവിനുള്ള അംഗീകാരമായി ലഭിച്ചിട്ടുണ്ട്.