ആറ്റിങ്ങല്‍: നാടുകാണാനിറങ്ങിയ പെരുമ്പാമ്പിനെ നാട്ടുകാര്‍ പിടികൂടി പൊലിസ് സ്റ്റേഷനില്‍ എത്തിച്ചു. ഇന്നലെ രാത്രി ഒമ്പത് മണിയോടെ വാമനപുരം നദിക്കരയില്‍ അവനവഞ്ചേരി മുള്ളിയില്‍ കടവിനു സമീപത്തെ വീട്ടിനു മുന്നില്‍ കിടന്ന പെരുമ്പാമ്പിനെ അതുവഴി പോയ യുവാവാണ് ആദ്യം കണ്ടത്.
അയാള്‍ കൂട്ടുകാരെയും സമീപത്തെ വീട്ടുകാരെയും വിവരം അറിയിച്ചു. ഇതിനിടയില്‍ കടന്നു കളയാന്‍ ശ്രമിച്ച പാമ്പിനെ ഒരു യുവാവ് പിടികൂടി കയറില്‍ കെട്ടിയിട്ടു. തുടര്‍ന്ന് ചാക്കിലാക്കി ആറ്റിങ്ങല്‍ സ്റ്റേഷനില്‍ എത്തിച്ചു. പൊലിസിനെ ചാക്കു തുറന്ന്കാട്ടുന്നതിനിടയില്‍ അത് പുറത്തു ചാടിയത് സ്റ്റേഷന്‍ പരിസരത്ത് പരിഭ്രാന്തി പരത്തി. ആറ്റിങ്ങല്‍ എസ്.ഐ പ്രശാന്ത് വിവരം അറിയിച്ചതിനെ തുടര്‍ന്ന് രണ്ടുമണിക്കൂറിനു ശേഷം വനം വകുപ്പുകാര്‍ എത്തി കൊണ്ടുപോകുകയായിരുന്നു. വനത്തില്‍ കൊണ്ടുപോയി തുറന്നുവിടുമെന്ന് അവര്‍ പറഞ്ഞു.പാമ്പിന് ഇരുപത് കിലോയോളം തൂക്കം വരും.