എരുമപ്പെട്ടി: ആക്ട്‌സ് എരുമപ്പെട്ടി യൂനിറ്റിന്റെ നേതൃത്വത്തില്‍ കാന്‍സര്‍ രോഗ ബോധവല്‍കരണ സെമിനാര്‍ സംഘടിപ്പിച്ചു. ഒറ്റപാലം  വെല്‍ഫയര്‍  ട്രസ്റ്റ്  ഡയഗ്നോസ്റ്റിക്‌സ് ലബോറട്ടറിയുടെ നേതൃത്വത്തില്‍  15-ാം തിയ്യതി എരുമപ്പെട്ടി ഗവ: എല്‍.പി. സ്‌കൂളില്‍ നടത്തുന്ന സൗജന്യ കാന്‍സര്‍ രോഗ പരിശോധന ക്യാംപിന്റെ ഭാഗമായാണ് സെമിനാര്‍ സംഘടിപ്പിച്ചത്. തോന്നല്ലൂര്‍ ക്ഷേത്രം ഊട്ട്പുര ഓഡിറ്റോറിയത്തില്‍ നടന്ന ക്യാംപ്  വേലൂര്‍ ഗ്രാമപഞ്ചായത്ത് അംഗം പി.കെ.ശ്യാംകുമാര്‍ ഉദ്ഘാടനം ചെയ്തു. ആക്ട്‌സ് യൂനിറ്റ് സെക്രട്ടറി വി.എസ്.ബി.നായര്‍ അധ്യക്ഷനായി. കോഡിനേറ്റര്‍മാരായ പ്രവീണ, ദാര എന്നിവര്‍ ക്ലാസെടുത്തു. രാജേഷ് അമ്പലപ്പാട്ട്, കുമാര്‍ പാത്രമംഗലം സംസാരിച്ചു.