കൊപ്പം: വിളയൂര്‍ പഞ്ചായത്തിലെ തുടിക്കല്‍ ജല സേചന പദ്ധതിയുടെ കാര്യക്ഷമമായ നടത്തിപ്പിന് രണ്ട് മോട്ടോറുകള്‍കൂടി സ്ഥാപിക്കും. 1994 ല്‍ തുടങ്ങിയ ഈ ജലസേചന പദ്ധതി വര്‍ഷങ്ങളായി പ്രവര്‍ത്തന രഹിതമായിരുന്നു. കഴിഞ്ഞ വര്‍ഷം നവീകരണം നടത്തി മൂന്ന് മോട്ടോറുകള്‍ സ്ഥാപിച്ച് പ്രവര്‍ത്തനം തുടങ്ങിയത്. വിളയൂരിലെ പത്തോളം വാര്‍ഡുകളില്‍ കൃഷി ആവശ്യത്തിനും മറ്റും കര്‍ഷര്‍ ആശ്രയിച്ചിരുന്നത് ഈ പദ്ധതിയെയാണ്. ഏതാനും ആഴ്ച്ചകളായി മോട്ടോറുകള്‍ പ്രവര്‍ത്തന രഹിതമായി ഇതിന്റെ ഫലം ജനങ്ങള്‍ക്ക് ലഭ്യമായിരുന്നില്ല. ഈ വിഷയം കര്‍ഷകരും നാട്ടുകാരും പഞ്ചായത്തതികൃതരെ അറിയിച്ചതിന്റെ അടിസ്ഥാനത്തില്‍ ഗ്രാമപഞ്ചായത്ത് പ്രസിഡന്റ് കെ മുരളി സംഭവസ്ഥലം സന്ദര്‍ശിച്ചിക്കുകയും രണ്ട് മോട്ടോറുകള്‍ പ്രവര്‍ത്തനക്ഷമമാക്കാന്‍ നടപടി സ്വീകരിക്കുകയും ചെയ്തു. ഇന്നലെ ഓവര്‍സിയര്‍ സ്ഥലം സന്ദര്‍ശിക്കുകയും കേടുവന്ന ബാക്കി മോട്ടോറുകര്‍ ഉടന്‍ ശരിയാക്കുമെന്നും പദ്ധതിയുടെ ഫലപ്രദമായ നടത്തിപ്പിന്ന് രണ്ട് മോട്ടോറുകള്‍ കൂടി സ്ഥാപിക്കുമെന്നും പറഞ്ഞു. പദ്ധതിയുടെ പ്രവര്‍ത്തനം നിലച്ച സാഹചര്യത്തില്‍ അടിയന്തിരമായി ഇടപെടാന്‍ കൃഷി വകുപ്പ് മന്ത്രിയുടെ ഓഫിസുമായി ബന്ധപ്പെട്ടതായി പഞ്ചായത്ത് അധികൃതര്‍ അറിയിച്ചു.