കോഴിക്കോട്: കാലിക്കറ്റ് പ്രസ്‌ക്ലബിന്റെ ആഭിമുഖ്യത്തില്‍ സംഘടിപ്പിക്കുന്ന വാര്‍ത്താ ചിത്രപ്രദര്‍ശനം 'ടര്‍ബുലന്റ് ലെന്‍സ് ' നാളെ മുതല്‍  17 വരെ ലളിതകലാ അക്കാദമി ആര്‍ട്ട് ഗാലറിയില്‍ നടക്കും. രാവിലെ 11.30ന് പ്രശസ്ത ഫോട്ടോഗ്രാഫര്‍ പുനലൂര്‍ രാജന്‍ ഉദ്ഘാടനം ചെയ്യും. 14ന് 11.30ന് സമകാലിക 'ചിത്രം-വര-വാക്ക് ' വിഷയത്തില്‍ അജ്ഞനാ ശശിയുടെ നേതൃത്വത്തില്‍ സംവാദം നടക്കും. പി. മുസ്തഫ, മദനന്‍, ഷാഹിന കെ. റഫീഖ് പങ്കെടുക്കും. 15ന് വിദ്യാര്‍ഥികള്‍ക്കായി ഓണ്‍ ദി സ്‌പോട്ട് ഫോട്ടോഗ്രഫി മത്സരവും 16ന് നിക്കോണ്‍ മെന്റര്‍ വി. ഐസക് സാം നയിക്കുന്ന ഫോട്ടോഗ്രഫി ക്ലാസുമുണ്ടാകും.
17ന് നടക്കുന്ന സമാപന സമ്മേളനം ജില്ലാ കലക്ടര്‍ എന്‍. പ്രശാന്ത് ഉദ്ഘാടനം ചെയ്യും. മുതിര്‍ന്ന ഫോട്ടോഗ്രാഫര്‍മാരായ ചോയിക്കുട്ടി, പി. വിശ്വനാഥ്, പി. മുസ്തഫ, വി. ആലി, ജയിംസ് ആര്‍പ്പൂക്കര എന്നിവരെ ചടങ്ങില്‍ ആദരിക്കും. കോഴിക്കോട്ടെ ന്യൂസ് ഫോട്ടോഗ്രാഫര്‍മാരുടെ മികച്ച ഫോട്ടോകളാണ് പ്രദര്‍ശനത്തിലുണ്ടാവുക. വാര്‍ത്താസമ്മേളനത്തില്‍ പ്രസ്‌ക്ലബ് പ്രസിഡന്റ് കമാല്‍ വരദൂര്‍, സംഘാടക സമിതി കണ്‍വീനര്‍ രാജേഷ് മേനോന്‍, റസല്‍ ഷാഹുല്‍, പി. വിപുല്‍ നാഥ്, കെ.എസ് പ്രവീണ്‍കുമാര്‍, കെ.സി റിയാസ് പങ്കെടുത്തു.