തളിപ്പറമ്പ്: സ്വകാര്യ ബസും ബൈക്കും കൂട്ടിയിടിച്ച് ബൈക്ക് യാത്രക്കാരായ രണ്ടു യുവാക്കള്‍ക്ക് സാരമായി പരുക്കേറ്റു. അമിതവേഗതയാണ് അപകടകാരണമെന്നാരോപിച്ച് ബസിന്റെ മുന്‍ഭാഗത്തെ ചില്ലുകള്‍ ഒരു സംഘം ആളുകള്‍ അടിച്ചു തകര്‍ത്തു.
മാതമംഗലം സ്വദേശികളായ കെ രാഹുല്‍ (22), എം സിദ്ധാര്‍ഥ് (20) എന്നിവര്‍ക്കാണ് പരുക്കേറ്റത്. തിങ്കളാഴ്ച വൈകുന്നേരം നാലരയോടെ തളിപ്പറമ്പ്-ആലക്കോട് സംസ്ഥാനപാതയില്‍ പുഷ്പഗിരി ഒമാന്‍ മസ്ജിദിനു സമീപത്തായിരുന്നു സംഭവം. ആലക്കോട് ഭാഗത്തേക്കു പോകുന്ന യുവാക്കള്‍ സഞ്ചരിച്ച പള്‍സര്‍ ബൈക്കില്‍ പെരുമ്പടവില്‍ നിന്നു തളിപ്പറമ്പിലേക്കു വരികയായിരുന്നു നയന ബസ് ഇടിക്കുകയായിരുന്നു. ബസിനുള്ളില്‍ കുടുങ്ങിയ ഇരുവരേയും നാട്ടുകാര്‍ എത്തിയാണ് പുറത്തെടുത്തത്. പരുക്കേറ്റവരെ മംഗളൂരു ആശുപത്രിയിലേക്ക് കൊണ്ടുപോയി.