മട്ടാഞ്ചേരി: മോഹന്‍ലാല്‍ നായകനായ പുലി മുരുകന്‍ സിനിമയുടെ ടിക്കറ്റ് തട്ടിയെടുത്ത് കടന്ന രണ്ട് യുവാക്കള്‍ മട്ടാഞ്ചേരി പൊലിസ് പിടിയിലായി.
തുരുത്തി സ്വദേശികളായ ഷിഹാബ്,തന്‍സീര്‍ എന്നിവരാണു മട്ടാഞ്ചേരി എസ്.ഐ വി ജോഷിയുടെ നേതൃത്വത്തില്‍ അറസ്റ്റ് ചെയ്തത്.
പനയപ്പിള്ളി ഇ.വി.എം തിയേറ്ററില്‍ ഇന്നലെ രാവിലെ ടിക്കറ്റ് ബുക്ക് ചെയ്യാനെത്തിയവരാണ് കൗണ്ടറില്‍ കൈയിട്ട് ടിക്കറ്റ് വില്‍ക്കുന്ന ആളിന്റെ കൈയ്യില്‍ നിന്ന് 67 ടിക്കറ്റുകളും ആയിരം രൂപയും തട്ടിയെടുത്തത്. തിയേറ്റര്‍ ജീവനക്കാരന്‍ ജോയിയുടെ പരാതിയില്‍ പൊലിസ് കേസെടുക്കൂകയും പ്രതികള്‍ രക്ഷപ്പെടാന്‍ ഉപയോഗിച്ച വാഹനത്തിന്റെ നമ്പറും രൂപവും വച്ച് അന്വേഷണം നടത്തി ഫോര്‍ട്ട്‌കൊച്ചി തുരുത്തിയില്‍ നിന്നും അറസ്റ്റ് ചെയ്യുകയായിരുന്നു.
ഒന്നാം പ്രതി ഷിഹാബിന്റെ വീട്ടില്‍ നിന്നും തട്ടിയെടുത്ത ടിക്കറ്റുകള്‍ കണ്ടെടുത്തു. പുലിമുരുകന്‍ സിനിമയുടെ ടിക്കറ്റുകള്‍ വ്യാപകമായി കരിഞ്ചന്തയില്‍ വില്‍ക്കുന്നതായും പരാതിയുണ്ട്.