ഇരിട്ടി: മുസ്‌ലിം ലീഗ് നേതാവ് തറാല്‍ ഈസയുടെ വീട്ടുമുറ്റത്ത് നിര്‍ത്തിയിട്ട കാറിന്റെ ചില്ല് തകര്‍ക്കുകയും ബൈക്ക് തീവച്ച് നശിപ്പിക്കുകയും ചെയ്ത സംഭവത്തില്‍ വ്യാപക പ്രതിഷേധം. സമാധാന അന്തരീക്ഷം നിലനില്‍ക്കുന്ന മേഖലയില്‍ കുഴപ്പങ്ങള്‍ ഉണ്ടാക്കാന്‍ ശ്രമിക്കുന്ന ഛിദ്രശക്തികളെ എത്രയും പെട്ടെന്ന് നിയമത്തിന് മുന്നില്‍ എത്തിക്കാനുള്ള നടപടി പൊലിസിന്റെ ഭാഗത്ത് നിന്ന് ഉണ്ടാവണമെന്ന് അഡ്വ.സണ്ണി ജോസഫ് എം.എല്‍.എ ആവശ്യപ്പെട്ടു. കണ്ണൂര്‍ സിറ്റിയിലെ കൊലപാതകത്തിന് ശേഷം ആറളം വിളക്കോട് പ്രദേശങ്ങളില്‍ വ്യാപകമായി മുസ്‌ലിം ലീഗ് ബോര്‍ഡുകളും കൊടിമരങ്ങങ്ങളും നശിപ്പിക്കപ്പെട്ട സംഭവം ഉണ്ടായിട്ടുണ്ടെന്നും അക്രമത്തിന് പിന്നില്‍ ആരായാലും മുഖം നോക്കാതെ നടപടി സ്വീകരിക്കണമെന്നും മുസ്‌ലിം ലീഗ് നേതാവ് ഇബ്രാഹിം മുണ്ടേരി ആവശ്യപ്പെട്ടു. സംഭത്തില്‍ മുഴക്കുന്ന് പഞ്ചായത്ത് യു.ഡി.എഫ് കമ്മറ്റി പ്രതിഷേധിച്ചു. വി രാജു, ഒ ഹംസ, കെ.വി റഷീദ് സംസാരിച്ചു.