കോഴിക്കോട്: ബസുകളുടെ മരണപ്പാച്ചിലിനു തടയിടാനായി പൊലിസ് സ്‌പെഷല്‍ ഡ്രൈവ് ആരംഭിച്ചു. കഴിഞ്ഞദിവസം മാവൂര്‍ റോഡ് ജങ്ഷനില്‍ ബസിന്റെ അമിതവേഗം കാരണം വയോധികന്‍ മരിക്കാനിടയായ സംഭവത്തെ തുടര്‍ന്നാണ് സ്‌പെഷല്‍ ഡ്രൈവ് തുടങ്ങിയത്. ബസുകളുടെ അമിതവേഗം നിയന്ത്രിക്കുന്നതിനും അപകടം വരുത്തുന്നവിധം ബസ് ഓടിക്കുന്നതും തടയുകയാണ് സ്‌പെഷല്‍ ഡ്രൈവിന്റെ ലക്ഷ്യം. ട്രാഫിക് എ.സി എ.കെ ബാബുവിന്റെ നേതൃത്വത്തിലാണ് പരിശോധന. അമിതവേഗത ശ്രദ്ധയില്‍പ്പെട്ടാല്‍ ഡ്രൈവര്‍മാരുടെ ലൈസന്‍സ് റദ്ദാക്കുന്നതുള്‍പ്പെടെയുള്ള നടപടി സ്വീകരിക്കും. അമിതവേഗം നിയന്ത്രിക്കാന്‍ നഗരത്തിന്റെ വിവിധയിടങ്ങളിലായി മഫ്ടി പൊലിസിനെ വിന്യസിപ്പിക്കും.
ഇടതുവശത്ത് കൂടി മറികടക്കുന്ന ഇരുചക്രവാഹനങ്ങള്‍ക്കെതിരേയും പ്രധാന റോഡില്‍ നിന്ന് പെട്ടെന്ന് തിരിയുന്ന ഓട്ടോറിക്ഷകള്‍ക്കെതിരേയും നടപടിയെടുക്കും. ഇന്നലെ നഗരത്തിന്റെ വിവിധ ഭാഗങ്ങളില്‍ പരിശോധന നടന്നു. അതേസമയം അപകടങ്ങളുണ്ടാകുമ്പോള്‍ മാത്രമുള്ള ഈ പരിശോധന പ്രഹസനമാണെന്ന ആക്ഷേപവും ശക്തമാണ്. പരിശോധന രണ്ടോ മൂന്നോ ദിവസം കഴിഞ്ഞാല്‍ നിലയ്ക്കുന്നതും വീണ്ടും വാഹനങ്ങള്‍ പഴയത് ആവര്‍ത്തിക്കുന്നതുമാണ് ഇതിനു കാരണം. ബസ് ഡ്രൈവര്‍മാരുടെ അശ്രദ്ധ കാരണം ഈ വര്‍ഷം 140 പേര്‍ക്കാണ് ജീവന്‍ നഷ്ടമായത്. അമിതവേഗത്തില്‍ ഓടുന്ന ബസുകള്‍ ഇടിച്ച് പരുക്കേറ്റവരും നിരവധിയാണ്. ഇതിനുപുറമെ കാതടപ്പിക്കുന്ന തരത്തിലുള്ള എയര്‍ ഹോണ്‍ മുഴക്കലും ബസിന്റെ ഡോറില്‍ അടിച്ച് ഇരുചക്രവാഹനക്കാരെ പേടിപ്പിക്കുന്നതും ബസുകാരുടെ പതിവ് രീതിയാണ്.
മിക്കപ്പോഴും ബസുകാരെ പേടിച്ച് ചെറിയ വാഹനങ്ങള്‍ സൈഡിലേക്ക് ഒതുക്കി നിര്‍ത്തുകയാണ് പതിവ്. തിങ്കളാഴ്ച മാവൂര്‍ റോഡില്‍ സ്‌കൂട്ടര്‍ യാത്രക്കാരനു പിന്നാലെ നിര്‍ത്താതെ ഹോണടിച്ച് അമിതവേഗത്തില്‍ വന്ന ബസ് ഇടിക്കുകയായിരുന്നു. ഇടിയുടെ ആഘാതത്തില്‍ ബസിനടിയിലേക്ക് തെറിച്ചുവീണ സ്‌കൂട്ടര്‍ യാത്രക്കാരന്‍ അബ്ദുറഹ്മാന്‍ ബസിന്റെ പിന്‍ചക്രം തലയില്‍ കയറിയാണ് മരിച്ചത്. സ്റ്റോപ്പുകളില്‍ യാത്രക്കാര്‍ക്ക് ഇറങ്ങാനോ കയറാനോ പലപ്പോഴും ബസ് ജീവനക്കാര്‍ സാവകാശം നല്‍കാറില്ല. ഇങ്ങനെയും അപകടങ്ങള്‍ പതിവാണ്. ഇത്തരം സംഭവങ്ങള്‍ ഇനി അനുവദിക്കില്ലെന്ന നിലപാട് ശക്തമാക്കാനാണ് പൊലിസ് സ്‌പെഷല്‍ ഡ്രൈവ് നടത്തുന്നത്.