തൊട്ടില്‍പ്പാലം: തളീക്കര കാഞ്ഞിരോളിയില്‍ വിദ്യാര്‍ഥിയെ ജീവനക്കാരന്‍ ബസില്‍ നിന്ന് ഇറക്കിവിടുകയും മര്‍ദിക്കുകയും ചെയ്ത സംഭവത്തില്‍ പോലിസ് പക്ഷപാതമായി പെരുമാറുന്നുവെന്ന് കായക്കൊടി പഞ്ചായത്ത് മുസ്‌ലിം ലീഗ് കമ്മിറ്റി ആരോപിച്ചു.
നിസാര സംഭവത്തിന്റെ പേരില്‍ നിരപരാധികളായ സ്‌കൂള്‍ വിദ്യാര്‍ഥികളെ കള്ളക്കേസില്‍ അറസ്റ്റു ചെയ്യുകയും ഇവരെ സന്ദര്‍ശിക്കാനെത്തിയ മുസ്‌ലിം ലീഗ്, യൂത്ത് ലീഗ് നേതാക്കളോട് തൊട്ടില്‍പ്പാലം പോലിസ് മോശമായി പെരുമാറുകയും ചെയ്ത നടപടി പ്രതിഷേധാര്‍ഹമാണെന്നും യോഗം അഭിപ്രായപ്പെട്ടു. സമാധാനം തകര്‍ക്കുന്ന ശ്രമങ്ങള്‍ക്കെതിരേ നിയമപാലകര്‍ ശക്തമായ നടപടി സ്വീകരിക്കണമെന്ന് യോഗം ആവശ്യപ്പെട്ടു. ഇ. അബ്ദുല്‍ അസീസ് മാസ്റ്റര്‍ അധ്യക്ഷനായി. കെ.കെ ഉമ്മര്‍ മാസ്റ്റര്‍, സി.കെ പോക്കര്‍, കെ.കെ.സി കുഞ്ഞബ്ദുല്ല, ഇ.കെ കരണ്ടേത്താട് സംസാരിച്ചു.