കൊച്ചി: ബാര്‍കോഴക്കേസ് പിന്‍വലിക്കണമെന്ന് ആവശ്യപ്പെട്ട ബാബുറാം വിജിലന്‍സ് ഡയറക്ടര്‍ക്ക് കത്തയച്ചത് താന്‍ അറിഞ്ഞിട്ടല്ലെന്ന് മുന്‍മന്ത്രി കെ ബാബു. അങ്ങിനെ കത്തയച്ചതിന്റെ പേരില്‍ തനിക്ക് യാതൊരു ഗുണവും ഉണ്ടായിട്ടില്ല.

ബാബുറാം പരിചയക്കാരന്‍ മാത്രമാണ്. അയാളുടെ ബിസിനസുമായി തനിക്ക് യാതൊരു ബന്ധവുമില്ല. അനധികൃത സ്വത്തു സമ്പാദനക്കേസില്‍ ചോദ്യംചെയ്യലിനായി വിജിലന്‍സ് ആസ്ഥാനത്ത് എത്തിയതായിരുന്നു ബാബു.

ബാബുവിനെതിരേ കൂടുതല്‍ തെളിവുകള്‍ കിട്ടിയതിനെ തുടര്‍ന്നാണ് വിജിലന്‍സ് നടപടി. ബാബുവിന്റെ ബിനാമിയെന്ന് വിജിലന്‍സ് ആരോപിച്ച കുമ്പളം സ്വദേശി ബാബുറാം, തൃപ്പൂണിത്തുറ സ്വദേശി മോഹനന്‍ എന്നിവരുമായുള്ള ബന്ധം വെളിവാക്കുന്ന തെളിവുകളാണ് വിജിലന്‍സിന് ലഭിച്ചത്.

നേരത്തെ ബാര്‍കോഴക്കേസ് പിന്‍വലിക്കണം എന്നാവശ്യപ്പെട്ട് ബാബുറാം ആഭ്യന്തരമന്ത്രിക്കും വിജിലന്‍സ് ഡയറക്ടര്‍ക്കും കത്ത് നല്‍കിയിരുന്നു. ഈ കത്തിന്റെ പകര്‍പ്പും ഇരുവരും തമ്മിലുളള ഫോണ്‍ സംഭാഷണത്തിന്റെ രേഖകളും വിജിലന്‍സ് കണ്ടെത്തി.  

ഫോണ്‍കോള്‍ ഡീറ്റെയ്ല്‍സ് ഭാഗികമായി പരിശോധിച്ചതില്‍ ബാബുവും ബിനാമികളുമായി 180ലേറെ തവണ ബന്ധപ്പെട്ടതിന്റെ വിവരങ്ങള്‍ വിജിലന്‍സിന് ലഭിച്ചു.

സൈബര്‍സെല്ലിനെ ഉപയോഗിച്ച് വിശദമായ പരിശോധന നടത്തി കൂടുതല്‍ വിവരങ്ങള്‍ ശേഖരിച്ചാല്‍ മാത്രമേ ബാബുവും ബന്ധുക്കളും ബിനാമികളും തമ്മിലുള്ള ബന്ധം സംബന്ധിച്ച കൂടുതല്‍ വിവരങ്ങള്‍ ലഭിക്കൂ.