കൊച്ചി: ജിപ്‌സം വില്‍പനയുമായി ബന്ധപ്പെട്ട അഴിമതി ആരോപണങ്ങളെ തുടര്‍ന്ന് പൊതുമേഖലാ സ്ഥാപനമായ ഫാക്ടിലെ ഉന്നത ഉദ്യോഗസ്ഥരുടെ വീട്ടില്‍ സി.ബി.ഐ രാജ്യവ്യാപകമായി  നടത്തിയ റെയ്ഡില്‍  വന്‍ നിക്ഷേപങ്ങളുടെ രേഖകളും പുള്ളിമാന്റെ തോലും കണ്ടെത്തി.
ഡെ.ജനറല്‍ മാനേജറുടെ വീട്ടില്‍ നിന്നാണ് പുള്ളിമാന്റെ തോല്‍ പിടിച്ചെടുത്തത്. സ്വകാര്യ കമ്പനിക്ക് വില കുറച്ച് ജിപ്‌സം വില്‍പന നടത്തിയതില്‍ കോടിക്കണക്കിന് രൂപയുടെ അഴിമതി നടന്നുവെന്ന ആരോപണത്തെ തുടര്‍ന്നായിരുന്നു റെയ്ഡ്. ഉദ്യോഗമണ്ഡലിലെ ഫാക്ടിന്റെ കോര്‍പറേറ്റ് ഓഫിസ്,  ചെയര്‍മാനും മാനേജിങ് ഡയറക്ടറുമായ ജയ്‌വീര്‍ ശ്രീവാസ്തവ അടക്കമുള്ള ഉന്നത ഉദ്യോഗസ്ഥരുടെ വീടുകള്‍, ജിപ്‌സം കരാര്‍ ലഭിച്ച സ്ഥാപനങ്ങള്‍ എന്നിവ ഉള്‍പ്പെടെ വിവിധ സംസ്ഥാനങ്ങളിലെ 24 കേന്ദ്രങ്ങളിലായിരുന്നു റെയ്ഡ്.
കൊച്ചിക്ക് പുറമേ മുംബൈ, ഡല്‍ഹി, കൊല്‍ക്കത്ത, ഹൈദരാബാദ്, കോയമ്പത്തൂര്‍, ചെന്നൈ തുടങ്ങിയ കേന്ദ്രങ്ങളില്‍ ഇന്നലെ രാവിലെ ഒരേസമയത്താണ് റെയ്ഡ് ആരംഭിച്ചത്. ഇത് രാത്രിവരെ തുടര്‍ന്നു. സി.ബി.ഐയുടെ വിവിധ സംസ്ഥാനങ്ങളിലെ യൂനിറ്റുകളുടെ സഹകരണത്തോടെയായിരുന്നു മിന്നല്‍ പരിശോധന.
മൂന്നാം പ്രതിയായ ഡെപ്യൂട്ടി ജനറല്‍ മാനേജര്‍ ശ്രീനാഥ് ജി കമ്മത്തിന്റെ എറണാകുളം അമ്മന്‍കോവില്‍ റോഡിലെ വീട്ടില്‍ നടന്ന റെയ്ഡില്‍ പുള്ളിമാന്‍ തോലിന് പുറമെ 65 ലക്ഷം രൂപയുടെ ബാങ്ക് ഡെപ്പോസിറ്റ് രേഖകളും സ്വര്‍ണാഭരണങ്ങള്‍ സൂക്ഷിച്ച രണ്ട് ബാങ്ക് ലോക്കറുകളുടെ താക്കോലും ലഭിച്ചു. മറ്റൊരു ഡെപ്യൂട്ടി ജനറല്‍ മാനേജര്‍ അംബികയുടെ വടുതലയിലെ വീട്ടിലും റെയ്ഡ് നടന്നു. ഫാക്ടിലെ ഉപോല്‍പന്നമായ ജിപ്‌സം വില്‍പന നടത്തുന്നതില്‍ ക്രമക്കേട് നടത്തി അനര്‍ഹരായ സ്ഥാപനങ്ങള്‍ക്ക് കരാര്‍ നല്‍കിയതിലൂടെ ഫാക്ടിന് കോടിക്കണക്കിന് രൂപയുടെ നഷ്ടം വരുത്തിവച്ചെന്ന് ഫാക്ടിലെ വിജിലന്‍സ് വിഭാഗം മാസങ്ങള്‍ക്ക് മുന്‍പ് കണ്ടെത്തിയിരുന്നു. ഇതുസംബന്ധിച്ച് കേന്ദ്ര രാസവളം മന്ത്രാലയത്തിന് റിപ്പോര്‍ട്ട് നല്‍കുകയും ചെയ്തിരുന്നു. ഈ റിപ്പോര്‍ട്ടിന്റെ അടിസ്ഥാനത്തിലാണ് സി.ബി.ഐ അന്വേഷണത്തിന് ഉത്തരവിട്ടത്. ടണ്ണിന് 600 രൂപ മുതല്‍ 2200 രൂപവരെ ലഭിച്ചിരുന്ന ജിപ്‌സം എന്‍.എസ്.എസ് പ്രൈവറ്റ് ലിമിറ്റഡ് എന്ന കമ്പനിക്ക് ടണ്ണിന് 130 രൂപ നിരക്കില്‍ വില്‍പന നടത്തിയതില്‍ ഫാക്ടിന് എട്ടു കോടി രൂപയുടെ നഷ്ടം സംഭവിച്ചെന്നാണ് വിജിലന്‍സ് പരിശോധനയില്‍ കണ്ടെത്തിയത്.
 റെയ്ഡില്‍ പിടിച്ചെടുത്തിട്ടുള്ള രേഖകളും മറ്റ് തൊണ്ടി സാധനങ്ങളും നാളെ സി.ബി.ഐ കോടതിയില്‍ ഹാജരാക്കും. ശ്രീനാഥ് ജി കമ്മത്തിന്റെ വീട്ടില്‍ നിന്ന് പിടിച്ചെടുത്ത  മാനിന്റെ തോല്‍ പൂജ നടത്തുമ്പോള്‍ ഇരിക്കാന്‍ ഉപയോഗിച്ചിരുന്നതാണ് എന്ന് കരുതുന്നു. മലയാറ്റൂര്‍ ഡി.എഫ്.ഒ സ്ഥലത്തെത്തി മാന്‍തോല്‍ കസ്റ്റഡിയില്‍ എടുത്തു. വന്യജീവി സംരക്ഷണ നിയമ പ്രകാരം ശ്രീനാഥിനെതിരേ വനംവകുപ്പ് കേസെടുത്തു. പിടിച്ചെടുത്ത മാന്‍തോല്‍ ശാസ്ത്രീയ പരിശോധനക്കയക്കാനാണ് തീരുമാനം.