ശ്രീനഗര്‍:ജമ്മു കശ്മിരിലെ ബാരാമുള്ളയില്‍ നിന്നും രണ്ട് ജെയ്‌ഷെ മുഹമ്മദ് ഭീകരരെ സുരക്ഷാ സേന അറസ്റ്റ് ചെയ്തു. രണ്ട് സൈനികരും ഒരു പൊലിസ് കോണ്‍സ്റ്റബിളും മരിക്കാനിടയായ ആക്രമണത്തില്‍ പങ്കാളികളായ സഫീര്‍ അഹമ്മദ് ഭട്ട്, ഫര്‍ഹാന്‍ ഫയാസ് എന്നിവരാണ് പിടിയിലായ ഭീകരരെന്ന് പൊലിസ് അറിയിച്ചു.
ബാരാമുള്ള മേഖലയില്‍ ആക്രമണത്തിനായാണ് ഇരുവരെയും നിയോഗിച്ചിരുന്നത്. ഇവര്‍ക്ക് നേതൃത്വം നല്‍കിയിരുന്നത് പാക് ഭീകരനായ ഖാലിദ് ആണെന്നും പൊലിസ് പറയുന്നു. ഇവര്‍ കഴിഞ്ഞ ഓഗസ്റ്റില്‍ നടത്തിയ ആക്രമണത്തിലാണ് രണ്ട് സൈനികരും ഒരു പൊലിസ് കോണ്‍സ്റ്റബിളും മരിച്ചത്. ഭീകരരില്‍ നിന്ന് ഒരു എ.കെ. 47 തോക്ക്, ഒരു പിസ്റ്റള്‍, സ്‌ഫോടക വസ്തുക്കള്‍ എന്നിവ കണ്ടെടുത്തിട്ടുണ്ട്.
ഭീകരര്‍ ഒളിവില്‍ കഴിയുന്നുണ്ടെന്ന വിവരത്തിന്റെ അടിസ്ഥാനത്തില്‍ ബാരാമുള്ളയിലെ വീടുകള്‍ തോറും നടത്തിയ പരിശോധനയിലാണ് ഇരുവരും പിടിയിലായത്. ഇവര്‍ക്കായുള്ള തെരച്ചിലിനിടയില്‍ പാകിസ്താന്റേയും ചൈനയുടേയും കൊടിയും സ്‌ഫോടക വസ്തുക്കളും കണ്ടെടുത്തിരുന്നു.