കൊട്ടിയം: സഹകരണ മേഖലയിലെ ആധുനികവല്‍കരണം നിലനില്‍പ്പിന്റെ അനിവാര്യതയാണെന്ന് സഹകരണ മന്ത്രി എ.സി മൊയ്തീന്‍ പറഞ്ഞു. ആദിച്ചനല്ലൂര്‍ ഫാര്‍മേഴ്‌സ് സര്‍വിസ് സഹകരണബാങ്കിന്റെ നവീകരിച്ച ഹെഡ്ഓഫിസ് മന്ദിരത്തിന്റെയും കോര്‍ ബാങ്കിങ് സംവിധാനത്തോടെയുള്ള കംപ്യൂട്ടറൈസേഷന്റെയും ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു മന്ത്രി.
ആധുനികതയോടുള്ള പുതുതലമുറയുടെ താല്‍പ്പര്യത്തെ സംരക്ഷിക്കുന്ന തരത്തില്‍ ആധുനികവല്‍ക്കരണത്തിന് പരിഗണന നല്‍കുമ്പോള്‍ തന്നെ സാഹചര്യങ്ങള്‍ക്ക് ഇണങ്ങും വിധം പദ്ധതികള്‍ സഹകരണബാങ്കുകള്‍ തയാറാകണം.ജനാഭിലാഷം മുന്‍നിര്‍ത്തി സഹകരണ മേഖലയില്‍ നേരിട്ടും അല്ലാതെയും ഒരുലക്ഷം പേര്‍ക്ക് തൊഴില്‍ സൃഷ്ടിക്കാന്‍ പദ്ധതി ആരംഭിക്കും. ടൂറിസം വികസനത്തിന്റെ കൂടി ഭാഗമായി ആദിച്ചനല്ലൂര്‍ ചിറയുടെ നവീകരണത്തിനും വൈവിധ്യവല്‍ക്കരണത്തിനും രണ്ടാംഘട്ട അനുമതി ഉടന്‍ നല്‍കുമെന്നും എ.സി മൊയ്തീന്‍ പറഞ്ഞു. ജി.എസ് ജയലാല്‍ എം.എല്‍.എ അധ്യക്ഷനായി. പി രാജേന്ദ്രന്‍, ആദിച്ചനല്ലൂര്‍ പഞ്ചായത്ത് പ്രസിഡന്റ് എന്‍ അജയകുമാര്‍, ജില്ലാ പഞ്ചായത്ത് അംഗങ്ങളായ സി.പി പ്രദീപ്, എന്‍. രവീന്ദ്രന്‍, സഹകരണസംഘം ജോയിന്റ് രജിസ്ട്രാര്‍ എ. എസ് ഷീബാബീവി, ബി.എസ് പ്രവീണ്‍ദാസ്, സരസമണി, ബ്‌ളോക്ക് പഞ്ചായത്ത് അംഗങ്ങളായ ഷെര്‍ളി സ്റ്റീഫന്‍, മൈലക്കാട് സുനില്‍, ശ്രീജാഹരീഷ്, സി. തങ്കപ്പന്‍, കെ. സേതുമാധവന്‍, എന്‍. സന്തോഷ്, അമൃത, എ. പ്രദീപ്, കെ.വി പ്രമോദ് ജോര്‍ജ് ഫിലിപ്പ്,ബാങ്ക് പ്രസിഡന്റ് എം. സുബാഷ് സംസാരിച്ചു. മാനേജിങ് ഡയറക്ടര്‍ പി.സി കാര്‍ത്തികേയന്‍നായര്‍ റിപ്പോര്‍ട്ട് അവതരിപ്പിച്ചു.