എടച്ചേരി: പാരമ്പര്യ വിത്തുകളുടെ സംരക്ഷകനായ ബത്തേരി സ്വദേശി നെല്ലച്ഛന്‍ എന്ന പേരില്‍ അറിയപ്പെടുന്ന  ചെറുവയല്‍ രാമന്റെ വീടും നെല്‍പാടവും വിദ്യാര്‍ഥികള്‍ സന്ദര്‍ശിച്ചു.എടച്ചേരി നരിക്കുന്ന് യു.പി സ്‌കൂള്‍ വിദ്യാര്‍ഥികളാണ് നെല്‍കൃഷി അന്യം നിന്നുപോകുന്ന വര്‍ത്തമാന കാലത്ത് സാമ്പ്രദായിക കൃഷികളെക്കുറിച്ച് നേരിട്ട് മനസ്സിലക്കാനായി ഫീല്‍ഡ് ട്രിപ്പ് സംഘടിപ്പിച്ചത്. നെല്‍വര്‍ഷ ആഘോഷത്തിന്റെ ഭാഗമായാണ് വിദ്യാര്‍ഥികള്‍ അധ്യാപകര്‍ക്കൊപ്പം രാമന്റെ വീടും കൃഷിസ്ഥലവും സന്ദര്‍ശിച്ചത്.
കേന്ദ്ര സര്‍ക്കാരിന്റേതടക്കം നിരവധി അവാര്‍ഡുകള്‍ ഇതിനകം രാമന്‍ കരസ്ഥമാക്കിയിട്ടുണ്ട്. 48ഓളം നെല്‍വിത്തുകളെക്കുറിച്ചുളള കാര്‍ഷിക അറിവുകള്‍ വിദ്യാര്‍ഥികളുമായി രാമന്‍ പങ്കുവച്ചു. ധനേഷ്, പ്രജുഷ,വരുണ്‍ അമല്‍,ജ്യോതി എന്നിവര്‍ സന്ദര്‍ശനത്തിന് നേതൃത്വം നല്‍കി.