മണ്ണാര്‍ക്കാട്: 42 കുപ്പി പോണ്ടിച്ചേരി വിദേശമദ്യവുമായി അട്ടപ്പാടിയില്‍ വൃദ്ധ പിടിയില്‍. ഒരു മാസത്തിനിടെ ഇതോടെ അട്ടപ്പാടിയില്‍ 224 കുപ്പി വിദേശമദ്യമാണ് പിടികൂടിയത്.
അട്ടപ്പാടി മേലെ കോട്ടത്തറ വലയര്‍ കോളനിയിലെ കറുപ്പത്താളി (71)നെയാണ് എക്‌സൈസ് ജനമൈത്രി സര്‍ക്കിള്‍ ഇന്‍സ്‌പെക്ടറും സംഘവും പിടികൂടിയത്.
ഒരു മാസമായി ജനമൈത്രി സ്‌ക്വാഡിന്റെ നേതൃത്വത്തില്‍  കേരള - തമിഴ്‌നാട് അതിര്‍ത്ഥികളിലും, കോട്ടത്തറ ഭാഗങ്ങളിലും വ്യാജമദ്യം ശക്തമായി തടയുന്നതിന്റെ ഭാഗമായി നടത്തി വരുന്ന ഓപ്പറേഷന്‍ വൈറ്റ് വാഷിന്‍ എന്ന പേരില്‍ നടത്തിയ ഓപ്പറേഷനിലാണ് പ്രതിയെ പിടികൂടിയത്.
റെയ്ഡില്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.ജി ടോമി, പ്രിവെന്റീവ് ഓഫീസര്‍ എം. യൂനസ്, സിവില്‍ എക്‌സൈസ് ഓഫിസര്‍മാരായ കെ. അജിത്, കെ. അബിലാഷ്, പി.കെ രാജേഷ്, പി.കെ ബൈജു നേതൃത്വം നല്‍കി.