ശ്രീകൃഷ്ണപുരം: സംസ്ഥാന പാതയായ ഒറ്റപ്പാലം-ആര്യമ്പാവ് റോഡിലെ മംഗലാംകുന്നില്‍  അപകടങ്ങള്‍ തുടര്‍ക്കഥയാവുന്നു. റോഡ് നിര്‍മാണത്തിലെ അശാസ്ത്രീയതയും ഘടനയുമാണ് അപകടങ്ങള്‍ക്ക് കാരണം. മംഗലാംകുന്നിന് സമീപത്തുള്ള കൊടുംവളവില്‍ കഴിഞ്ഞ ദിവസം രാത്രി കാര്‍ അപകടത്തില്‍പ്പെട്ടിരുന്നു. ഈ വളവില്‍ എതിരേ വരുന്ന വാഹനങ്ങള്‍ പരസ്പരം കാണാന്‍ സാധിക്കുന്നില്ല. അപകടത്തെ സൂചിപ്പിക്കുന്ന സൂചിക ബോര്‍ഡ് ഇവിടെ ഇല്ല. അപകടത്തില്‍ പെട്ട സ്‌കോര്‍പ്പിയോ കാറിലുള്ളവര്‍ തലനാഴിരക്കാണ് രക്ഷപ്പെട്ടത്. മണ്ണാര്‍ക്കാട് നിന്ന് എറണാകുളത്തിലേക്കുള്ള യാത്രയിലായിരുന്നു സംഘം. റോഡിന്റെ ഘടന പെട്ടെന്ന് മനസിലാക്കാന്‍ സാധിക്കാത്തത് കൊണ്ടാണ് അപകടമുണ്ടായതെന്ന് ഡ്രൈവര്‍ പറഞ്ഞു. കഴിഞ്ഞ ആഴ്ച്ച ഇവിടെ ഒരു സ്വകാര്യ ബസും മിനി ലോറിയും അപകടത്തില്‍പെട്ടിരുന്നു.
കഴിഞ്ഞ ഒരു വര്‍ഷത്തിനുള്ളില്‍ 25 ലധികം അപകടങ്ങളാണ് ഇവിടെ നടന്നത്. ഒരാള്‍ മരിക്കുകയും നിരവധി പേര്‍ക്ക്  പരുക്കേല്‍ക്കുകയും ചെയ്തു. റബ്ബര്‍റൈസ് ചെയ്യുമ്പോള്‍ അപകട വളവുകള്‍ ഇല്ലാതാക്കുമെന്ന് അധികൃതര്‍ പറഞ്ഞിരുന്നു. റോഡിന്റെ ഇരുവശവും മണ്ണിട്ട് സമമാക്കാത്തതും അപകടം സൃഷ്ടിക്കുന്നു.