ഹൈദരാബാദ്: ലൈഫ് സ്റ്റൈൽ വീഡിയോകളിലൂടെ പ്രശസ്തയായ പ്രമുഖ യൂട്യൂബർ ബോനു കോമാലിയെ (21) വീടിനുള്ളിൽ മരിച്ച നിലയിൽ കണ്ടെത്തി. തിങ്കളാഴ്ചയാണ് ഹൈദരാബാദിലെ വാടക വീട്ടിൽ യുവതിയെ തൂങ്ങിമരിച്ച നിലയിൽ കണ്ടത്. ആന്ധ്രാപ്രദേശ് വിശാഖപട്ടണം സ്വദേശിയായ കോമാലി ബിഎസ്‌സി പഠനത്തിനായാണ് ഹൈദരാബാദിൽ താമസിച്ചിരുന്നത്.

കുവൈത്തിൽ ജോലി ചെയ്യുന്ന അമ്മയ്ക്ക് 'ഐ ലവ് യു മമ്മി' എന്നും അനിയനെ നന്നായി നോക്കണമെന്നും സന്ദേശം അയച്ച ശേഷമാണ് കോമാലി ജീവനൊടുക്കിയത്. പിന്നീട് ഫോൺ സ്വിച്ച് ഓഫ് ആയതോടെ പരിഭ്രാന്തയായ അമ്മ സുഹൃത്തിനെ വിവരമറിയിക്കുകയായിരുന്നു.

ALSO READ: 'കേരള സ്റ്റോറി 2' റിലീസ് തടഞ്ഞ സംഭവം; ഡിവിഷൻ ബെഞ്ചിൽ അപ്പീൽ നൽകി നിർമാതാക്കൾ

സുഹൃത്ത് ഫ്ലാറ്റിലെത്തി വാതിലിൽ മുട്ടി നോക്കിയെങ്കിലും വാതിൽ തുറക്കുന്നുണ്ടായിരുന്നില്ല. തുടർന്ന്, വാതിലിന്റെ കൊളുത്ത് പൊളിച്ചു നോക്കിയപ്പോഴാണ് സീലിംഗ് ഫാനിൽ തൂങ്ങിയ നിലയിൽ മൃതദേഹം കണ്ടെത്തിയത്. സ്ഥലത്ത് നിന്ന് സാരിയും ഒരു ഗോവണിയും പൊലിസ് കണ്ടെടുത്തിട്ടുണ്ട്.

മൂന്ന് വർഷമായി ഒരു സോഫ്റ്റ്‌വെയർ എൻജിനീയറുമായി കോമാലി പ്രണയത്തിലായിരുന്നു. ഈ ബന്ധത്തിലുണ്ടായ തകർച്ചയും മാനസിക വിഷമവുമാണ് ആത്മഹത്യയ്ക്ക് പിന്നിലെന്ന് പൊലിസ് സംശയിക്കുന്നു.

ബോനുവിന്റെ മൃതദേഹം പോസ്റ്റ്‌മോർട്ടത്തിനായി ഉസ്മാനിയ ജനറൽ ആശുപത്രിയിലേക്ക് മാറ്റിയിരിക്കുകയാണ്. സംഭവത്തിൽ കേസെടുത്ത പൊലിസ് അന്വേഷണം ആരംഭിച്ചിട്ടുണ്ട്.

21-year-old YouTuber Bonu Komali was found dead in her Hyderabad flat after sending an emotional text to her mother in Kuwait. Police suspect emotional distress due to a prolonged relationship dispute.