ദുബൈ: യുഎഇയിൽ നിന്ന് ഇന്ത്യയിലേക്കുള്ള വിമാനയാത്രാ നിരക്കുകൾ മറ്റ് അന്താരാഷ്ട്ര റൂട്ടുകളെ അപേക്ഷിച്ച് അതിവേഗം വർദ്ധിക്കുന്നതായി റിപ്പോർട്ട്. വേനൽക്കാല അവധി ഉൾപ്പെടെയുള്ള തിരക്കേറിയ സമയങ്ങളിൽ യുഎഇ-ഇന്ത്യ റൂട്ടിലെ ടിക്കറ്റ് നിരക്കിൽ ശരാശരി 25 ശതമാനം വരെ വർദ്ധനവാണ് രേഖപ്പെടുത്തുന്നത്. മറ്റ് പ്രധാന വിദേശ രാജ്യങ്ങളിലേക്കുള്ള നിരക്ക് വർദ്ധനവിനേക്കാൾ കൂടുതലാണിതെന്ന് യാത്രാ വ്യവസായ രംഗത്തെ വിദഗ്ധർ ചൂണ്ടിക്കാട്ടുന്നു.

ലോകത്തെ തിരക്കേറിയ അഞ്ചാമത്തെ വ്യോമപാത

നിലവിലെ കണക്കുകൾ പ്രകാരം ഇന്ത്യയും യുഎഇയും തമ്മിലുള്ള വ്യോമപാത ലോകത്തെ ഏറ്റവും തിരക്കേറിയ റൂട്ടുകളിൽ അഞ്ചാം സ്ഥാനത്താണ്. 2026 ഫെബ്രുവരിയിലെ കണക്കനുസരിച്ച് 2.08 ദശലക്ഷം സീറ്റുകളാണ് ഈ റൂട്ടിലുള്ളത്. കഴിഞ്ഞ വർഷം ഇത് ആറാം സ്ഥാനത്തായിരുന്നു. യാത്രക്കാരുടെ എണ്ണത്തിൽ വൻ വർദ്ധനവുണ്ടായിട്ടും സീറ്റ് ശേഷി കൂട്ടാൻ സാധിക്കാത്തതാണ് നിരക്ക് കുതിച്ചുയരാൻ പ്രധാന കാരണമായി പറയുന്നത്.

സഊദി, യുകെ തുടങ്ങിയ രാജ്യങ്ങളിലേക്കുള്ള നിരക്ക് വർദ്ധനയുമായി താരതമ്യം ചെയ്യുമ്പോൾ ഇന്ത്യൻ റൂട്ടിലാണ് യാത്രക്കാർക്ക് കൂടുതൽ സാമ്പത്തിക ഭാരം അനുഭവപ്പെടുന്നത്.

• ഇന്ത്യ: തിരക്കേറിയ സമയങ്ങളിൽ 15-25% വരെ വർദ്ധനവ്.
• സഊദി അറേബ്യ: 8-12% വരെ വർദ്ധനവ്.
• യുകെ: 10-18% വരെ വർ​ദ്ധനവ്.

ALSO READ: ദുബൈയിൽ പാർക്കിംഗ് നിരക്ക് വർദ്ധിച്ചേക്കും; ആർടിഎയ്ക്ക് അപേക്ഷ സമർപ്പിച്ച് 'പാർക്കിൻ' 

കുറഞ്ഞ കാലയളവിലേക്കുള്ള സന്ദർശനങ്ങൾ, കുടുംബ യാത്രകൾ എന്നിവ കാരണം ഇന്ത്യൻ വിപണി എന്നും വോളിയം അടിസ്ഥാനമാക്കിയാണ് പ്രവർത്തിക്കുന്നത്. എന്നാൽ ഡിമാൻഡിന് അനുസരിച്ച് സീറ്റുകൾ ലഭ്യമാകാത്തത് അവസാന നിമിഷം ടിക്കറ്റ് എടുക്കുന്നവർക്ക് വലിയ തിരിച്ചടിയാവുന്നു.

യാത്രക്കാരുടെ എണ്ണത്തിൽ ഇന്ത്യ ഒന്നാമതാണെങ്കിലും വളർച്ചയുടെ വേഗതയിൽ സഊദി റൂട്ട് വലിയ മുന്നേറ്റമാണ് നടത്തുന്നത്. യുഎഇയും സഊദിയും തമ്മിലുള്ള വ്യാപാര ഇടപാടുകൾ വർദ്ധിച്ചതാണ് ഇതിന് കാരണം. യുഎഇ-യുകെ റൂട്ട് കൂടുതൽ സ്ഥിരതയാർന്നതാണെന്നും പ്രധാനമായും വിനോദസഞ്ചാരത്തെയും പ്രീമിയം യാത്രകളെയുമാണ് ഇത് ആശ്രയിക്കുന്നതെന്നും മുസാഫിർ ഡോട്ട് കോം സി.ഒ.ഒ റഹീഷ് ബാബു പറഞ്ഞു.

2022-ന് ശേഷം ഇന്ത്യൻ സെക്ടറിലെ ശരാശരി നിരക്കിൽ 10 മുതൽ 15 ശതമാനം വരെ വർദ്ധനവുണ്ടായിട്ടുണ്ട്. സീറ്റ് ശേഷി വർദ്ധിപ്പിക്കുന്നത് സംബന്ധിച്ച് ഇരു രാജ്യങ്ങളും തമ്മിലുള്ള ചർച്ചകൾ ഫലം കണ്ടാൽ മാത്രമേ വരും കാലങ്ങളിൽ നിരക്ക് വർദ്ധനവിന് ആശ്വാസമുണ്ടാകൂ എന്നാണ് ഈ മേഖലയിലുള്ളവർ പറയുന്നത്.

air ticket prices on the uae india route are increasing at a faster pace compared to other international sectors, according to a recent report. high travel demand, limited seat availability, and seasonal rush are cited as key reasons.