ദുബൈ: ദുബൈയിലെ പൊതു പാർക്കിംഗ് നിരക്കുകൾ വരും മാസങ്ങളിൽ വർദ്ധിക്കാൻ സാധ്യത. നഗരത്തിലെ പാർക്കിംഗ് സേവന ദാതാക്കളായ 'പാർക്കിൻ' (Parkin), നിലവിലെ നിരക്കുകളിലും സീസണൽ പാർക്കിംഗ് കാർഡ് ഘടനയിലും മാറ്റം വരുത്തുന്നതിനായി ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റിക്ക് (RTA) അപേക്ഷ സമർപ്പിച്ചു.

ബുധനാഴ്ച പുറത്തിറക്കിയ വാർത്താക്കുറിപ്പിലൂടെയാണ് കമ്പനി ഇക്കാര്യം അറിയിച്ചത്. ആർടിഎയുടെയും ദുബൈ എക്സിക്യൂട്ടീവ് കൗൺസിലിന്റെയും അന്തിമ അംഗീകാരം ലഭിച്ചാൽ നഗരത്തിലെ ശരാശരി പാർക്കിംഗ് നിരക്കിൽ വർദ്ധനവുണ്ടാകും.

നിലവിലുള്ള വില വ്യത്യാസങ്ങൾ കുറയ്ക്കുന്നതിനും കഴിഞ്ഞ വർഷം അവതരിപ്പിച്ച വേരിയബിൾ പ്രൈസിംഗ് രീതിയുമായി പുതിയ നിരക്കുകളെ യോജിപ്പിക്കുന്നതിനുമാണ് നീക്കമെന്ന് കമ്പനി വ്യക്തമാക്കി. എന്നാൽ ഉപഭോക്താക്കൾക്ക് നൽകിവരുന്ന നിലവിലെ ഡിസ്കൗണ്ട് ആനുകൂല്യങ്ങൾ പുതിയ നിർദ്ദേശത്തിലും സംരക്ഷിക്കപ്പെടുമെന്ന് പാർക്കിൻ ഉറപ്പുനൽകിയിട്ടുണ്ട്.

ALSO READ: കമ്പനിയിൽ നിന്നും പണം തട്ടിയ പബ്ലിക് റിലേഷൻസ് മാനേജർക്ക് കനത്ത തിരിച്ചടി; 2.9 ലക്ഷം ദിർഹം നഷ്ടപരിഹാരം നൽകാൻ കോടതി ഉത്തരവ് 

കഴിഞ്ഞ വർഷം ഏപ്രിലിൽ വേരിയബിൾ പാർക്കിംഗ് താരിഫ് നിലവിൽ വന്നതിനുശേഷം ദുബൈയിലെ പാർക്കിംഗ് നിരക്കുകളിൽ വലിയ മാറ്റം രേഖപ്പെടുത്തിയിരുന്നു. 2025 സെപ്റ്റംബർ ആയപ്പോഴേക്കും മണിക്കൂറിലെ ശരാശരി പാർക്കിംഗ് നിരക്ക് 2.01 ദിർഹത്തിൽ നിന്ന് 3.03 ദിർഹമായി ഉയർന്നിരുന്നു. പുതിയ അപേക്ഷ കൂടി അംഗീകരിക്കപ്പെടുന്നതോടെ നിരക്ക് വീണ്ടും വർദ്ധിക്കാനാണ് സാധ്യത.

പാർക്കിംഗ് സ്ഥലങ്ങളുടെ എണ്ണത്തിലും ഈ വർഷം വർദ്ധനവുണ്ടാകുമെന്ന് കമ്പനി അറിയിച്ചു. ഏകദേശം 5,500 മുതൽ 7,500 വരെ പുതിയ പാർക്കിംഗ് ഇടങ്ങൾ ഈ വർഷം നഗരത്തിൽ കൂട്ടിച്ചേർക്കും. 2025-ൽ 625.5 മില്യൺ ദിർഹം അറ്റാദായം നേടിയ കമ്പനി, പാർക്കിംഗ് മേഖലയിൽ നിന്ന് വലിയ വരുമാന വർദ്ധനവാണ് ഈ വർഷം ലക്ഷ്യമിടുന്നത്.

parking charges in the emirate could see a hike after a formal proposal was submitted seeking fare revision. the move aims to review current tariffs, improve parking management efficiency, and support sustainable urban mobility initiatives across key zones.