കൊല്ലങ്കോട്: അതിര്‍ത്തി പ്രദേശമായ മുതലമട ചെമ്മണാംമ്പതി നീലംകാച്ചി പുഴയുടെ പ്രദേശത്തുള്ള എ വണ്‍ ക്വോറിയുടെ സമീപത്തായി ദീപാവലിയുടെ ആഘോഷത്തില്‍ നടത്തിയ പണം വച്ചുള്ള കോഴിപ്പോരില്‍ കൊല്ലങ്കോട് പൊലിസിന്റെ ഒത്താശ. ഉത്സവങ്ങള്‍ക്കും ആഘോഷങ്ങള്‍ക്കും ഇതെല്ലാം പതിവാണെന്ന പഴമൊഴിയാണ് പൊലിസ് പറയുന്നതെന്ന് നാട്ടുകാര്‍ പറയുന്നു. തുടരെ വിളിച്ചതിനെ തുടര്‍ന്നാണ് പൊലിസ് സ്ഥലത്തെത്തിയത്. കോഴിപ്പോര് നടത്തിയ എട്ടു പേര്‍ക്കെതിരേ കൊല്ലങ്കോട് പൊലിസ് കേസെടുത്തു.  
15 പേര്‍ കോഴികളെയും 6500 രൂപയം സംഭവസ്ഥലത്തു നിന്നും പൊലിസ് കണ്ടെടുത്തു. പതിനായിരങ്ങള്‍ വച്ച് നടത്തുന്ന കോഴിപ്പോരില്‍ നിസാര തുക മാത്രമേ ലഭിച്ചുള്ളൂ എന്നാണ് പൊലിസ് ഭാഷ്യം. എന്നാല്‍ കൂടുതല്‍ തുക ഇവരില്‍ നിന്നും കണ്ടെത്തിയിട്ടും ഇവര്‍ക്ക് വേണ്ട സൗകര്യങ്ങള്‍ ചെയ്തു കൊടുക്കുകയാണെന്ന ആരോപണമാണ് നാട്ടുകാര്‍ ഉന്നയിക്കുന്നത്. പോര്‍ കോഴി വച്ച് അതിര്‍ത്തി പ്രദേശങ്ങളില്‍ വ്യാപകമായ തോതില്‍ തെങ്ങിന്‍ തോപ്പുകളില്‍  ലക്ഷങ്ങള്‍ പന്തയം വച്ച് മത്സരം നടത്തുമ്പോഴും പൊലിസിന് അറിയിച്ചാല്‍ വരാറില്ലന്നും ഇവരില്‍ നിന്നും നല്ലൊരു തുക കൈക്കൂലിയായി വാങ്ങിയും മറ്റു സല്‍ക്കാരത്തില്‍ ഏര്‍പ്പെട്ടും ഇത്തരക്കാരെ പൊലിസ് സംരക്ഷിക്കുക പതിവാണെന്നുമാണ് നാട്ടുകാര്‍ പറയുന്നത്. കഴിഞ്ഞ ദിവസം കാളവണ്ടിയോട്ടം നടത്തിയ വ്യക്തികള്‍ക്കെതിരേയും പൊലിസ് മൃദുസമീപനമാണ് സ്വീകരിച്ചത്. തമിഴ്‌നാട് കേരള അതിര്‍ത്തിയില്‍ മുതലമടയില്‍ വ്യാപകമായ അനധികൃതമായി പണം വച്ചുള്ള മത്സരങ്ങള്‍ നടക്കുമ്പോഴും ഇതിനെതിരേ കണ്ണടക്കുന്ന സ്വഭാവമാണ് കൊല്ലകോട് പൊലിസ് നടത്തി വരുന്നത്. മത്സരത്തിന്റെ പേരില്‍ മുന്‍ വര്‍ഷങ്ങളില്‍ കത്തി കുത്തും വെട്ടും നടന്നിട്ടും ജാഗ്രത പുലര്‍ത്തുന്നതിന് പകരം ഇവര്‍ക്ക് ഒത്താശ ചെയ്യുന്നതിലാണ് പൊലിസിന് താല്‍പര്യമെന്നാണ് നാട്ടുകാരുടെ ആരോപണം.