ഗുരുവായൂര്‍ : നഗരത്തിലെ റോഡുകളുടെ ശോചനീയാവസ്ഥ ഉടന്‍ പരിഹരിക്കണമെന്നാവശ്യപ്പെട്ട് കെട്ടിടത്തിനു മുകളില്‍ കയറി യുവാവ് ആത്മഹത്യാ ഭീഷണി മുഴക്കിയത് പരിഭ്രാന്തി സൃഷ്ടിച്ചു. ഒറ്റയാള്‍ സമരങ്ങള്‍ നടത്തുന്ന താമരയൂര്‍ സ്വദേശി വല്‍സന്‍ ആണ് ഇന്നലെ ഉച്ചക്ക് 12ന് കിഴക്കേനടയില്‍ ടൗണ്‍ഹാളിനു മുന്നിലെ കുട്ടികൃഷ്ണന്‍ സ്മാരക കെട്ടിടത്തില്‍ കയറി ആത്മഹത്യ ഭീഷണി മുഴക്കിയത്.
ഇതോടെ നാട്ടുകാര്‍ തടിച്ചുകൂടി, പൊലിസും ഫയര്‍ഫോഴ്‌സും സ്ഥലത്തെത്തി. അരമണിക്കൂറോളം കെട്ടിടത്തിനു മുകളില്‍ നിന്ന വല്‍സനെ മുന്‍ നഗരസഭാ കൗണ്‍സിലര്‍ സന്തോഷ് തറയില്‍ നേതൃത്വത്തില്‍ അനുനയിപ്പിച്ച് താഴെയിറക്കി. പിന്നീട് നഗരസഭ ചെയര്‍മാന്റെ ചേംമ്പറിലെത്തി ഇയാള്‍ ആവശ്യം ഉന്നയിച്ചു.