കൊച്ചി: മതവിഭാഗങ്ങളുടെ ആഘോഷങ്ങള്‍ക്ക് കടിഞ്ഞാണിടാന്‍ സര്‍ക്കാരിന് സാധിക്കുന്നില്ലെന്നും ഏതു മതമാണ് ആഘോഷത്തിന് ആനയും വെടിക്കെട്ടും നിഷ്‌കര്‍ഷിക്കുന്നതെന്നും ഹൈക്കോടതിയുടെ വിമര്‍ശനം.

പരവൂര്‍ പുറ്റിങ്ങല്‍ ക്ഷേത്രത്തിലെ വെടിക്കെട്ട് ദുരന്തത്തെ തുടര്‍ന്ന് ക്ഷേത്രം ഭാരവാഹികളും വെടിക്കെട്ട് കരാറുകാരും നല്‍കിയ ജാമ്യാപേക്ഷ പരിഗണിക്കവെ ജസ്റ്റിസ് പി. ഉബൈദാണ് ഇക്കാര്യം വാക്കാല്‍ പറഞ്ഞത്. ആനയും വെടിക്കെട്ടുമില്ലെങ്കില്‍ മത വിശ്വാസം പുലരില്ലേയെന്നു ചോദിച്ച സിംഗിള്‍ബെഞ്ച് ഇവ നിയന്ത്രിക്കാന്‍ സര്‍ക്കാര്‍ ഭയക്കുകയാണെന്നും വാക്കാല്‍ കുറ്റപ്പെടുത്തി. പുറ്റിങ്ങല്‍ വെടിക്കെട്ടു ദുരന്തത്തെ തുടര്‍ന്ന് രജിസ്റ്റര്‍ ചെയ്ത കേസില്‍ ജാമ്യം തേടി ക്ഷേത്രം ഭാരവാഹികളായ കൃഷ്ണന്‍ കുട്ടി, പി.എസ്. ജയലാല്‍, പ്രസാദ്, സുരേന്ദ്രന്‍ പിള്ള, രവീന്ദ്രന്‍ പിള്ള, സോമസുന്ദരന്‍ പിള്ള, മുരുകേഷ്, എന്നിവരും വെടിക്കെട്ടു കരാറുകാരനായ കൃഷ്ണന്‍കുട്ടി, ലൈസന്‍സിയായ ഭാര്യ അനാര്‍ക്കലി എന്നിവരും നല്‍കിയ ജാമ്യാപേക്ഷയാണ് സിംഗിള്‍ബെഞ്ച് പരിഗണിക്കുന്നത്.

കേസന്വേഷണത്തില്‍ നിലവിലെ സ്ഥിതി എന്താണെന്ന് വ്യക്തമാക്കുന്ന റിപ്പോര്‍ട്ടും ഫോറന്‍സിക് ലാബ് റിപ്പോര്‍ട്ടിന്റെ പകര്‍പ്പും ഹരജികളില്‍ ഹാജരാക്കാന്‍ സിംഗിള്‍ബെഞ്ച് നിര്‍ദ്ദേശിച്ചു. പുറ്റിങ്ങല്‍ ദുരന്തവുമായി ബന്ധപ്പെട്ട് സമാനമായ ഹരജികളോ മുന്‍കൂര്‍ ജാമ്യഹര്‍ജികളോ നിലവിലുണ്ടെങ്കില്‍ അവയും ഇതോടൊപ്പം പരിഗണിക്കാമെന്ന് വ്യക്തമാക്കിയ സിംഗിള്‍ബെഞ്ച് ഹരജികള്‍ മെയ് 23 ലേക്ക് മാറ്റി.