.

ചെറുപുഴ : ഏറെ അനിശ്ചിതത്വങ്ങള്‍ക്കൊടുവില്‍ കേസ് രജിസ്റ്റര്‍ ചെയ്യാനുള്ള അനുമതി ലഭിച്ചുവെങ്കിലും ചെറുപുഴ പൊലിസ് സ്‌റ്റേഷന്റെ  പരാധീനതകള്‍ അവസാനിക്കുന്നില്ല. ഇവിടെ വനിതാ പൊലിസുകാര്‍ക്ക്  സുരക്ഷിതമായി താമസിക്കാനുള്ള സൗകര്യം പോലുമില്ല. കഴിഞ്ഞ അസംബ്ലി തെരഞ്ഞെടുപ്പിന് മുന്‍പ് മന്ത്രിമാര്‍ ഓടിനടന്ന് ഉദ്ഘാടനം ചെയ്യുന്നതിന്റെ ഭാഗമായാണ് ഈ പൊലിസ് സ്‌റ്റേഷനും ആരംഭിച്ചത്. ചെറുപുഴ പഞ്ചായത്തിന്റെ കീഴിലുള്ള മൃഗാശുപത്രി കെട്ടിടമൊഴിപ്പിച്ചാണ് പൊലിസ് സ്‌റ്റേഷന്‍ തുടങ്ങിയത്. പിന്നീട് നിലവിലുള്ള കക്കൂസുകളും മറ്റും നവീകരിച്ചുവെന്നല്ലാതെ  ആവശ്യത്തിനുള്ള സൗകര്യങ്ങളൊന്നും ഇവിടെയില്ല. കഴിഞ്ഞ മാസം വരെ രജിസ്‌ട്രേഷന്‍ ആരംഭിക്കാത്തതുകൊണ്ട് പ്രതികളെ മാതൃസ്‌റ്റേഷനായ പെരിങ്ങോത്തേക്കാണ് കൊണ്ടുപോയിരുന്നത്. ലോക്കപ്പ് സംവിധാനം ഇല്ലാത്തതുകൊണ്ട് പ്രതികള്‍ ഇറങ്ങിഓടിയ സംഭവം വരെ ഇവിടെയുണ്ടായിട്ടുണ്ട്. അതിനെക്കാളെല്ലാം ഉപരി വനിതാ പൊലിസുകാര്‍ക്ക് പ്രാഥമിക ആവശ്യങ്ങള്‍ നിറവേറ്റാനുള്ള സൗകര്യം പോലുമിവിടെയില്ല. പൊലിസ് സ്‌റ്റേഷനുമുകളിലത്തെ നിലയില്‍ ഒരു മുറി അനുവദിച്ചിട്ടുണ്ടെങ്കിലും അത് പൂട്ടിയിടാന്‍ പോലും കഴിയില്ല. ഈ പൊലിസ് സ്‌റ്റേഷനു സ്വതന്ത്ര ചുമതല ലഭിച്ചതോടെ പ്രശ്‌ന പരിഹാരവുമുണ്ടാകുമെന്ന പ്രതീക്ഷയിലാണ് ഇവര്‍.