കൊച്ചി : തൃക്കാക്കര നഗരസഭ ചെയര്‍പേഴ്‌സണിനെ വീട്ടിലിരുത്തി ഔദ്യോഗിക വാഹനത്തില്‍ രണ്ട് സി.പി.എം കൗണ്‍സിലര്‍മാര്‍ തിരുവന്തപുരത്തേക്ക് രഹസ്യയാത്ര നടത്തിയതിനെതിരേ കോണ്‍ഗ്രസ് തൃക്കാക്കര നിയോജക മണ്ഡലം കമ്മിറ്റി നഗരസഭ സെക്രട്ടറിക്ക് പരാതി നല്‍കി.
കൗണ്‍സില്‍ അംഗീകാരമില്ലാതെ ഔദ്യോഗിക വാഹനം ദുരുപയോഗം ചെയ്ത കൗണ്‍സിലര്‍മാര്‍ക്കെതിരേ നടപടി വേണമെന്നും പിഴയീടാക്കണമെന്നും മണ്ഡലം പ്രസിഡന്റ് എം.ഒ.വര്‍ഗീസ് പരാതിയില്‍ ആവശ്യപ്പെട്ടു. പ്രതിപക്ഷ കൗണ്‍സിലര്‍മാരായ അഡ്വ.പി.എം സലിം, സീനറഹ്മാന്‍, യൂത്ത് കോണ്‍ഗ്രസ് ഈസ്റ്റ് വെസ്റ്റ് മണ്ഡലം പ്രസിഡന്റുമാരായ റാഷിദ് ഉള്ളംമ്പിള്ളി, കെ.ബി ഷെരീഫ് എന്നിവര്‍ നേതൃത്വം നല്‍കി.
ഇന്ന് കൂടുന്ന കൗണ്‍സില്‍ യോഗത്തില്‍ പ്രതിപക്ഷം പ്രശ്‌നമുന്നയിക്കുമെന്ന് പ്രതിപക്ഷ നേതാവ് അഡ്വ.പി.എം.സലീം അറിയിച്ചു. ഓണാഘോഷ പരിപാടിയിലെ ധൂര്‍ത്തും കൗണ്‍സില്‍ യോഗത്തില്‍ വിവാദമാകും. മഹാബലിയുടെ ആസ്ഥാന നഗരസഭ എന്ന നിലയില്‍ സര്‍ക്കാര്‍ ഫണ്ട് നല്‍കിയിട്ടും ഓണാഘോഷ പരിപാടിയില്‍ സംഘാടകര്‍ അഞ്ചര ലക്ഷം രൂപയുടെ അധിക ബാധ്യത വരുത്തിയതാണ് വിവാദമായത്.
നഗരസഭ ചെയര്‍പേഴ്‌സണ്‍ കെ.കെ നീനുവിനെ വീട്ടിലിരുത്തിയിട്ട് രണ്ട് കൗണ്‍സിലര്‍മാര്‍ തിരുവന്തപുരത്ത് രഹസ്യയാത്ര നടത്തിയത് സംബന്ധിച്ച് നഗരസഭ സെക്രട്ടറി അന്വേഷിക്കുമെന്ന് അറിയിച്ചിട്ടുണ്ട്.
സെക്രട്ടറിയെ അറിയിക്കാതെയാണ് കൗണ്‍സിലര്‍മാര്‍ ചൊവ്വാഴ്ച രാവിലെ കൗണ്‍സിലര്‍മാരായ സി.പി സാജലും, സി.എ. നിഷാദും തിരുവനവന്തപുരത്തേക്ക് ഔദ്യോഗിക വാഹനത്തില്‍ രഹസ്യയാത്ര നടത്തിയത്.
സംഭവം വിവാദമായതോടെ നഗരസഭയുടെ മാര്‍ക്കറ്റിന് തറക്കല്ലിടല്‍ ചടങ്ങിന് മന്ത്രി കെ.ടി.ജലീലിനെ ക്ഷണിക്കാന്‍ പോയതെന്നാണ് കൗണ്‍സിലര്‍മാരുടെ വിശദീകരണം. എന്നാല്‍ കൗണ്‍സില്‍ ഇക്കാര്യം ചര്‍ച്ചചെയ്തിട്ടില്ലെന്ന് പ്രതിപക്ഷം ചൂണ്ടിക്കാട്ടി.