കൊച്ചി: കൊച്ചി കാന്‍സര്‍ റിസര്‍ച്ച് സെന്റര്‍ ഒ.പി വിഭാഗത്തിന്റെ ഔദ്യോഗിക ഉദ്ഘാടനം ഇന്ന് വൈകിട്ട് 3.30ന് മുഖ്യമന്ത്രി പിണറായി വിജയന്‍ നിര്‍വഹിക്കും. ഒ.പി വിഭാഗം നവംബര്‍ ഒന്നുമുതല്‍ പ്രവര്‍ത്തനം ആരംഭിച്ചെങ്കിലും ഉദ്ഘാടനം ഇന്ന് നടത്താന്‍ തീരുമാനിക്കുകയായിരുന്നു. കളമശ്ശേരിയിലെ എറണാകുളം ഗവണ്‍മെന്റ് മെഡിക്കല്‍ കോളജിനോട് ചേര്‍ന്നുള്ള കെട്ടിടത്തിലാണ് കാന്‍സര്‍ റിസര്‍ച്ച് സെന്ററിന്റെ ഔട്ട് പേഷ്യന്റ് വിഭാഗം സജ്ജമാക്കിയിരിക്കുന്നത്.
സര്‍ജിക്കല്‍ ഓങ്കോളജി, റേഡിയേഷന്‍ ഓങ്കോളജി, മെഡിക്കല്‍ ഓങ്കോളജി, പത്തോളജി, എന്നീ വിഭാഗങ്ങളിലാണ് ഡോക്ടര്‍മാരുടെ സേവനം ലഭ്യമാവുന്നത്. മെഡിക്കല്‍ കോളജിലെ സൗകര്യങ്ങള്‍ ഉപയോഗപ്പെടുത്താനും ധാരണയായിട്ടുണ്ട്. മധ്യകേരളത്തിലെ ആയിരക്കണക്കിന് കാന്‍സര്‍രോഗികള്‍ക്ക് ഏറെ പ്രയോജനം ചെയ്യുന്ന കാന്‍സര്‍ സെന്ററിന്റെ പ്രവര്‍ത്തനം മൂന്ന് ഘട്ടങ്ങളിലായി പൂര്‍ത്തിയാക്കാനാണ് ലക്ഷ്യമിടുന്നത്. ഇതിന്റെ ആദ്യഘട്ടമാണ് ഇന്ന് മുഖ്യമന്ത്രി ഉദ്ഘാടനം ചെയ്യുന്നത്. അടുത്തഘട്ടത്തില്‍ 150 കിടക്കകളുള്ള വാര്‍ഡുണ്ടാകും. മൂന്നാംഘട്ടത്തില്‍ 300 കിടക്കകളോടെ റിസര്‍ച്ച് സെന്റര്‍ പ്രവര്‍ത്തനം തുടങ്ങും.