തിരുവനന്തപുരം: മത്സ്യത്തൊഴിലാളികളുടെ ആരോഗ്യപരിപാലനത്തിനായി ഫിഷറീസ് വകുപ്പിന്റെ ആഭിമുഖ്യത്തില്‍ ആരോഗ്യ വകുപ്പുമായി സഹകരിച്ച് കരുംകുളം ഗ്രാമ പഞ്ചായത്തിലെ പുല്ലുവിളയിലുളള കമ്മ്യൂണിറ്റി ഹെല്‍ത്ത് സെന്റില്‍ സൗജന്യ മെഡിക്കല്‍ ക്യാംപും മരുന്നു വിതരണവും നടത്തും.
നാളെ രാവിലെ ജില്ലാ പഞ്ചായത്ത് പ്രസിഡന്റ് വി.കെ. മധു ഉദ്ഘാടനം ചെയ്യും. ജനറല്‍ മെഡിസിന്‍, ദന്തരോഗം, ത്വക്ക് രോഗം, ശിശുരോഗം, ഇ.എന്‍.ടി, ഗൈനക്കോളജി തുടങ്ങിയ വിഭാഗങ്ങളിലുളള ഡോക്ടര്‍മാരുടെ സേവനവും സഞ്ചരിക്കുന്ന നേത്രരോഗ വിഭാഗത്തിന്റെ സേവനവും ക്യാംപില്‍ ലഭിക്കും. രക്തഗ്രൂപ്പ് നിര്‍ണ്ണയത്തിനും, പ്രമേഹരോഗ നിര്‍ണ്ണയത്തിനും പ്രത്യേക സൗകര്യം ഒരുക്കിയിട്ടുണ്ട്. ഡോക്ടര്‍മാര്‍ നിര്‍ദ്ദേശിക്കുന്ന മരുന്നുകള്‍ സൗജന്യമായി ലഭ്യമാക്കുമെന്ന് ഫിഷറീസ് ഡെപ്യൂട്ടി ഡയറക്ടര്‍ അറിയിച്ചു.