പാലാ : വാഹനപരിശോധനക്കിടെ കഞ്ചാവുമായി യുവാവ് പിടിയില്‍. രാമപുരം ചെറുകുറിഞ്ഞി ഉപ്പുമാക്കല്‍ താജ് ബേബി(36)യാണു പാലാ എക്‌സൈസ് സംഘത്തിന്റെ വാഹന പരിശോധനക്കിടെ പിടിയിലായത്. കഴിഞ്ഞദിവസം രാവിലെ ഇടമറ്റത്തിനു സമീപം പാലാക്കാട്-വിളക്കുമാടം റോഡില്‍ വാഹനപരിശോധന നടത്തുകയായിരുന്നു എക്‌സൈസ് സംഘം.
ഇതുവഴി ബൈക്കിലെത്തിയ താജിനോട് വാഹനം നിര്‍ത്താന്‍ ആവശ്യപ്പെട്ടെങ്കിലും നിര്‍ത്താതെ പോയി. പിന്നാലെ എത്തി പിടികൂടി പരിശോധന നടത്തിയപ്പോള്‍ ബൈക്കിന്റെ ടൂള്‍ബോക്‌സിനുള്ളില്‍ ഒളിപ്പിച്ച നിലയില്‍ കഞ്ചാവ് കണ്ടെത്തുകയായിരുന്നു. സ്‌കൂള്‍ വിദ്യാര്‍ത്ഥികള്‍ക്ക് കഞ്ചാവ് എത്തിച്ചു നല്‍കുന്ന സംഘത്തിലെ കണ്ണിയാണ് പ്രതിയെന്ന് എക്‌സൈസ് പറയുന്നു. പാലാ ജുഡീഷ്യല്‍ ഒന്നാംക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു. എക്‌സൈസ് റേഞ്ച് ഇന്‍സ്‌പെക്ടര്‍ കെ. സന്തോഷ് കുമാറിന്റെ നേതൃത്വത്തില്‍ അസി. ഇന്‍സ്‌പെക്ടര്‍മാരായ രവീന്ദ്രന്‍ നായര്‍, ഇ.വി. തോമസ്, സിവില്‍ എക്‌സൈസ് ഓഫീസര്‍മാരായ എം.ജി അഭിലാഷ്, മനു ചെറിയാന്‍, ജോബി അഗസ്റ്റിന്‍, ജെസ്റ്റിന്‍ തോമസ്, വനിതാ ഓഫിസര്‍മാരായ ഷിയാമോള്‍, സജനി, ഡ്രൈവര്‍ റോഷി വര്‍ഗീസ് എന്നിവര്‍ വാഹനപരിശോധനയില്‍ പങ്കെടുത്തു.