ആലുവ : സ്‌കൂള്‍ ഡ്രൈവറെ മര്‍ദ്ദിച്ചതായി പരാതി. ആലുവ ഇസ്‌ലാമിക് ഹയര്‍ സെക്കന്ററി സ്‌കൂള്‍ ഡ്രൈവറും, ഉളിയന്നൂര്‍ തോട്ടത്തില്‍പറമ്പില്‍ അമീര്‍ (50)നാണ് മര്‍ദ്ദനമേറ്റത്. ഇന്നലെ രാവിലെ 11 മണിയോടെ സ്‌കൂളിന് മുന്‍വശത്തായിരുന്നു മര്‍ദ്ദനം. സ്‌കൂള്‍ ബസ്സ് പാര്‍ക്ക് ചെയ്തതിന് ശേഷം സ്‌കൂളിന് മുന്‍പില്‍ നില്‍ക്കുകയായിരുന്ന അമീറിനെ ഒരു പ്രകോപനവുമില്ലാതെയായിരുന്നു മര്‍ദ്ദനം.
ആലുവ ടൗണ്‍ ജുമാമസ്ജിദ് മുന്‍ പ്രസിഡന്റ് ഏലൂക്കര സ്വദേശിയായ ഹബീബാണ് ഇയാളെ മര്‍ദ്ദിച്ചത്. ഹബീബിനെതിരെ പള്ളി കമ്മിറ്റി സംബന്ധിച്ച് നിരവധി ആരോപണങ്ങള്‍ ഉയര്‍ന്നിരുന്നു. ഇതിനെ തുടര്‍ന്ന് ഇയാളുടെ നേതൃത്വത്തിലുള്ള കമ്മിറ്റിയെ നീക്കം ചെയ്ത് ഇപ്പോള്‍ കേരള വഖഫ് ബോര്‍ഡ് നേരിട്ടാണ് പള്ളിയുടെ ദൈനംദിന ഭരണം നടത്തിവരുന്നത്. ഇതുസംബന്ധിച്ച പ്രകോപനമാണ് മര്‍ദ്ദനത്തിന് കാരണമെന്ന് പറയപ്പെടുന്നു. മര്‍ദ്ദനമേറ്റ അമീര്‍ ജില്ലാ ആശുപത്രിയില്‍ ചികിത്സയിലാണ്.