കൂത്തുപറമ്പ്: പാതിരിയാട്ടെ സി.പി.എം പ്രാദേശിക നേതാവ് കെ മോഹനനെ കൊലപ്പെടുത്തിയ കേസില്‍ ഒരു പ്രതി കൂടി അറസ്റ്റില്‍. ആര്‍.എസ്.എസ് പ്രവര്‍ത്തകന്‍ മാഹി ചെമ്പ്രയിലെ ഇ സുബീഷി(30)നെയാണ് കൂത്തുപറമ്പ് സി.ഐ കെ.പി സുരേഷ് ബാബു അറസ്റ്റു ചെയ്തത്. കൊലപാതകം നടത്തിയ പ്രതികള്‍ക്ക് പള്ളൂരില്‍ ഒളിവില്‍ താമസിക്കാന്‍ സൗകര്യമൊരുക്കിക്കൊടുത്തുവെന്നാണ് ഇയാള്‍ക്കെതിരേയുള്ള കുറ്റം. കൊലപാതകം നടത്തിയതുള്‍പ്പെടെ ഒമ്പത് പ്രതികളെ ഇതിനകം പൊലിസ് അറസ്റ്റു ചെയ്തിട്ടുണ്ട്. സുബീഷിനെ കൂത്തുപറമ്പ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റു കോടതി റിമാന്‍ഡു ചെയ്തു. അതേസമയം സുബീഷിനെ കസ്റ്റഡിയില്‍ പൊലിസ് പീഡിപ്പിച്ചതായി സഹോദരന്‍ അജേഷ് തലശ്ശേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ പരാതി നല്‍കി. കേസ് പരിഗണിക്കുന്നത് 28ലേക്ക് മാറ്റി.