കാളികാവ്: നിലമ്പൂര്‍ വനമേഖലയില്‍ നടന്ന മാവോയിസ്റ്റ് വേട്ടക്ക് പൊലിസിനെ സഹായിച്ചത് മാവോയിസ്റ്റുകള്‍ക്കു സംഭവിച്ച പിഴവുകള്‍. രണ്ടു വര്‍ഷമായി നിലമ്പൂര്‍ കാടുകളില്‍ മാവോയിസ്റ്റ് താവളം തിരഞ്ഞ് നടന്ന പോലീസിന് ഒരു തുമ്പും കണ്ടെത്താന്‍ കഴിഞ്ഞിരുന്നില്ല.
മാവോയിസ്റ്റുകള്‍ തമ്പടിച്ചിരുന്നതിന് സമീപം ആറു കക്കൂസ് കുഴികളുണ്ടായിരുന്നു. താവളത്തിന്റെ 70 മീറ്റര്‍ അകലെ വരെയായാണ് ഇവ കാണപ്പെട്ടത്. ഉപയോഗമുള്ളതും നിറഞ്ഞ് കിടക്കുന്നതുമായ കുഴികള്‍ മാവോയിസ്റ്റ് സാന്നിധ്യത്തിന്റെ സൂചന നല്‍കുന്നതായിരുന്നു. മാവോയിസ്റ്റുകള്‍ ഉണ്ടെന്ന് ഉറപ്പിച്ചതോടെ പരിശോധനക്കിറങ്ങിയ ഇരു സംഘങ്ങളേയും ഒരുമിച്ചുകൂട്ടി പൊലിസ് ആസൂത്രണം നടത്തി.
മുന്നൊരുക്കത്തിന് അവസരം കിട്ടിയതിനാല്‍ പൊലിസിന് കരുതലോടെ നീങ്ങാനും കഴിഞ്ഞു. കുഴികളുടെ ഭാഗത്തുള്ള ചവിട്ടു വഴികളിലൂടെയാണ് മാവോയിസ്റ്റ് താവളത്തില്‍ പൊലിസെത്തിയത്.
പൊടുന്നനെ പൊലിസ് താവളത്തിലെത്തിയത് മാവോയിസ്റ്റ് കാവല്‍ ഭടന്‍മാരേയും പ്രതിസന്ധിയിലാക്കി. മാവോയിസ്റ്റുകളുടെ വര്‍ധിച്ച ആത്മവിശ്വാസവും അവര്‍ക്ക് വിനയായെന്നാണ് പൊലിസിന്റെ വിലയിരുത്തല്‍.