മഞ്ചേരി: മഞ്ചേരി ഗവ. ബോയ്‌സ് ഹയര്‍സെക്കന്‍ഡറി സ്‌കൂളില്‍ ഔഷധസസ്യ ഉദ്യാനത്തിനു തുടക്കമായി. സംസ്ഥാന ഔഷധസസ്യ ബോര്‍ഡിന്റെ ധനസഹായത്തോടെ കോട്ടക്കല്‍ ആര്യവൈദ്യശാല ഔഷധസസ്യഗവേഷണ കേന്ദ്രമാണ് പദ്ധതിക്കു നേതൃത്വം നല്‍കുന്നത്. പാലക്കാട്, മലപ്പുറം ജില്ലകളിലെ തെരഞ്ഞെടുത്ത 40 വിദ്യാലയങ്ങളിലാണ് പദ്ധതി നടപ്പാക്കുക.
50 ഔഷധ സസ്യങ്ങളാണ് പദ്ധതിപ്രകാരം നട്ടുവളര്‍ത്തുന്നത്. ഒരോ ചെടിയുടേയും ശാസ്ത്രീയനാമം, മലയാളത്തിലുള്ള പേര്, സസ്യകുടുംബത്തിന്റെ പേര്, ഔഷധ ഗുണങ്ങള്‍ എന്നിവ പ്രദര്‍ശിപ്പിച്ച ബോര്‍ഡും സ്ഥാപിച്ചിട്ടുണ്ട്.
നഗരസഭാ ചെയര്‍പേഴ്‌സണ്‍ വി.എം സുബൈദ ഉദ്ഘാടനം നിര്‍വഹിച്ചു.
വൈസ് ചെയര്‍മാന്‍ വി.പി ഫിറോസ് അധ്യക്ഷനായി. വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ സജ്‌ന ടീച്ചര്‍, കെ.സി കൃഷ്ണനുണ്ണിരാജ, പ്രിന്‍സിപ്പല്‍ വി.സി ഗീതാമണി, സംസ്ഥാന ഔഷധ സസ്യബോര്‍ഡ് പ്രിന്‍സിപ്പല്‍ ഡോ. കെ.എം പ്രഭുകുമാര്‍, ഔഷധസസ്യ ഗവേഷണ കേന്ദ്രം സയന്റിസ്റ്റ് മഹേഷ്‌കുമാര്‍, സ്‌കൂള്‍ ഹെഡ്മാസ്റ്റര്‍ പി സൈതലവി പങ്കെടുത്തു.