ബെയ്ജിങ്: ടിബറ്റന്‍ ആത്മീയ നേതാവ് കര്‍മാപായുടെ അരുണാചല്‍പ്രദേശ് സന്ദര്‍ശനത്തിനു പിറകെ, ഇന്ത്യ അതിര്‍ത്തി തര്‍ക്കം സങ്കീര്‍ണമാക്കരുതെന്ന ഉപദേശവുമായി ചൈന രംഗത്ത്. ഇരുരാജ്യങ്ങള്‍ക്കിടയില്‍ നിലനില്‍ക്കുന്ന അതിര്‍ത്തി തര്‍ക്കം കൂടുതല്‍ സങ്കീര്‍ണമാക്കുന്ന ഏതുതരം നീക്കങ്ങളില്‍നിന്നും ഇന്ത്യ വിട്ടുനില്‍ക്കുമെന്നാണു പ്രതീക്ഷയെന്നു ചൈനയുടെ വിദേശകാര്യ വക്താവ് പറഞ്ഞു.
സന്ദര്‍ശനത്തെ കുറിച്ചുള്ള മാധ്യമപ്രവര്‍ത്തകരുടെ ചോദ്യങ്ങളോടു പ്രതികരിക്കവെയാണ് ചൈനയുടെ വിദേശകാര്യ മന്ത്രാലയം വക്താവ് ലൂ കാങ് ഇക്കാര്യം വ്യക്തമാക്കിയത്. ടിബെറ്റന്‍ ബുദ്ധിസത്തിലെ പ്രധാന ധാരയായ കര്‍മാ കാഗ്യുവിന്റെ തലവനായ കര്‍മാപാ എന്നു വിളിക്കപ്പെടുന്ന ഒഗ്യെന്‍ ട്രൈന്‍ലി ദോര്‍ജെ ചൈന തെക്കന്‍ ടിബറ്റിന്റെ ഭാഗമാണെന്ന് അവകാശപ്പെടുന്ന അരുണാചല്‍പ്രദേശില്‍ കഴിഞ്ഞ ആഴ്ചയാണു സന്ദര്‍ശനം നടത്തിയത്.
ചൈന-ഇന്ത്യ അതിര്‍ത്തിയിലെ കിഴക്കന്‍ ഭാഗത്തെ കുറിച്ചുള്ള ചൈനയുടെ നിലപാട് വ്യക്തവും ഉറച്ചതുമാണ്. ഈ വിഷയത്തില്‍ ഇന്ത്യ ഉചിതമായ പൊതുസമ്മതത്തില്‍ തുടരുകയും അതിര്‍ത്തി പ്രശ്‌നം രൂക്ഷമാക്കുന്ന ഏതുതരം നടപടികളില്‍നിന്നും വിട്ടുനില്‍ക്കുകയും ചെയ്യുമെന്നാണു പ്രതീക്ഷിക്കുന്നതെന്ന് ലൂ കാങ് പറഞ്ഞു.