പെരിന്തല്‍മണ്ണ: അലിഗഢ് സര്‍വകലാശാലയുടെ മലപ്പുറം സെന്ററിനോടുള്ള അധികൃതരുടെ അനാസ്ഥയില്‍ പ്രതിഷേധിച്ചും സെന്ററില്‍ മലയാളി വിദ്യാര്‍ഥികള്‍ക്കുള്ള പ്രാധിനിധ്യക്കുറവ് പരിഹരിക്കുന്നതിനു വേണ്ടിയും അലിഗഢ്‌സംരക്ഷണ കാംപയിന്‍ സംഘടിപ്പിക്കാന്‍ പെരിന്തല്‍മണ്ണ മണ്ഡലം എം.എസ്.എഫ് തീരുമാനിച്ചു.
രണ്ടു മാസം നീണ്ടുനില്‍ക്കുന്ന കാംപയിനില്‍ അലിഗഡ് മലപ്പുറം സെന്ററില്‍ അടിസ്ഥാന സൗകര്യ വികസനങ്ങളൊരുക്കുക, പുതിയ കോഴ്‌സുകള്‍ ആരംഭിക്കുക, നിയമനങ്ങളില്‍ സുതാര്യത വരുത്തുക തുടങ്ങിയ ആവശ്യങ്ങള്‍ അധികൃതരുടെ ശ്രദ്ധയില്‍പ്പെടുത്തും. ആവശ്യമാകുന്ന സമയത്ത് വിദ്യാര്‍ഥി പ്രക്ഷോഭങ്ങള്‍ സംഘടിപ്പിക്കുകയും പ്രാദേശിക വിദ്യാര്‍ഥികള്‍ക്കിടയില്‍ അലിഗഢിനെ പരിചയപ്പെടുത്തുകയും പരിശീലന ക്ലാസുകള്‍ സംഘടിപ്പിക്കുകയും ചെയ്യും.
പ്രവര്‍ത്തക സമിതി യോഗം സംസ്ഥാന വിങ് കണ്‍വീനര്‍ റഷീദ് മേലാറ്റൂര്‍ ഉദ്ഘാടനം ചെയ്തു. കെ.പി ഫവാസ് അധ്യക്ഷനായി. സലാം മണലായ പദ്ധതി സമര്‍പ്പിച്ചു. മുബാറക് മയില്‍, ഷെനില്‍ ജൂബിലി, ഷാഫി ചുങ്കത്ത്, ഷെമീം മേല്‍ക്കുളങ്ങര, പി.ടി മുര്‍റത്ത്, റാഷിക് പൊന്യാകുര്‍ശ്ശി, അനസ് കുമ്പളാകുഴി, കെ.പി കോയ, പി. സമീജ്, സാജിദ് ഏലംകുളം സംസാരിച്ചു.