ജിദ്ദ: രാജ്യത്ത് വന്‍തോതില്‍ ചെമ്പ് നിക്ഷേപം കണ്ടെത്തി. മൂവായിരം ചതുരശ്രമീറ്റര്‍ സ്ഥലത്ത് സഊദി ജിയോളജിക്കല്‍ സര്‍വേ നടത്തിയ ഉദ്ഖനനത്തിലാണ് ഈ കണ്ടെത്തല്‍. പുത്തന്‍ സ്വര്‍ണഖനിയുടെ സൂചനകളും കണ്ടെത്തിയിട്ടുണ്ടെന്ന് അധികൃതര്‍ വ്യക്തമാക്കി. ഇതോടെ രാജ്യത്തെ മൊത്തം ഉല്‍പാദനം പത്ത് ടണ്‍ കൂടി വര്‍ധിപ്പിക്കാനാകും.
ചെമ്പിന്റെ കണ്ടെത്തല്‍ രാജ്യത്തെ എണ്ണ അധിഷ്ഠിത സമ്പദ്ഘടനയെ പുതിയൊരു സമ്പദ് വ്യവസ്ഥയിലേക്ക് കൊണ്ടെത്തിക്കുമെന്നും വിലയിരുത്തുന്നു. ആധുനിക സാങ്കേതികവിദ്യകള്‍ ഉപയോഗിച്ച് ചെമ്പിന്റെ ഉല്‍പാദനം കൂട്ടണമെന്നും നിര്‍ദേശമുണ്ട്.

സഊദി-ബഹ്‌റൈന്‍ പുതിയ പാലം വരുന്നു

ജിദ്ദ : സഊദിയെയും ബഹ്‌റൈനെയും ബന്ധിപ്പിക്കാന്‍ പുതിയ പാലം വരുന്നു. ഇത് സംബന്ധിച്ച് കഴിഞ്ഞ വര്‍ഷം മുന്നോട്ട് വെച്ചിരുന്ന പദ്ധതിക്ക് ഇരു രാജ്യങ്ങളും അംഗീകാരം നല്‍കി.
ഇതോടെ നിലവിലുള്ള കിങ് ഫഹദ് ക്രോസ് വേയ്ക്ക് പുറമെ ഇരുരാജ്യങ്ങള്‍ക്കുമിടയില്‍ മറ്റൊരു പാലം കൂടിയുവും.
പുതിയ പാലത്തിന് കിങ് ഹമദ് ബ്രിഡ്ജ് എന്നാണ് പേരിടുന്നത്. സ്വകാര്യമേഖലയില്‍ നിന്നായിരിക്കും പാലത്തിന്റെ നിര്‍മാണത്തിനായുള്ള ഫണ്ട് കണ്ടെത്തുക.
1986ല്‍ നിര്‍മിച്ച കിങ് ഫഹദ് ക്രോസ് വേ മാത്രമാണ് നിലവില്‍ ഇരു രാജ്യങ്ങളെയും ബന്ധിപ്പിക്കുന്ന പാലം.