ന്യൂഡല്‍ഹി: പ്രധാനമന്ത്രിയുടെ നോട്ടുപിന്‍വലിക്കലിനെ രൂക്ഷമായി വിമര്‍ശിച്ച് മുന്‍ ധനമന്ത്രി പി. ചിദംബരം. ഒരു ചാനലിനു നല്‍കിയ അഭിമുഖത്തിലാണ് ചിദംബരം തുറന്നടിച്ചത്.

നോട്ടു പിന്‍വലിക്കല്‍ വന്‍ അഴിമതിയാണ്. നോട്ട് അച്ചടിക്കുന്നതോടൊപ്പം കള്ളപ്പണക്കാരിലേക്ക് എത്തുന്നതുകൊണ്ടാണ് രാജ്യത്തിന്റെ വിവിധ ഭാഗങ്ങളില്‍ രണ്ടായിരത്തിന്റെ പുതിയ നോട്ടുകള്‍ എത്തുന്നത്.

തമിഴ്‌നാട്ടിന്റെ വിവിധ ഭാഗങ്ങളില്‍നിന്ന് കോടികളാണ് കഴിഞ്ഞ ദിവസങ്ങളില്‍ പിടിച്ചെടുത്തത്. അഴിമതിയല്ലെങ്കില്‍ പുതിയ നോട്ടുകള്‍ കള്ളപ്പണക്കാരിലേക്ക് എത്തുന്നതെങ്ങിനെയെന്നും ചിദംബരം ചോദിച്ചു.

സര്‍ക്കാര്‍ വ്യക്തമായ അന്വേഷണം നടത്തണം. ഒരു രാജ്യവും 86 ശതമാനം വരുന്ന പണം പിന്‍വലിച്ചിട്ടില്ല. ലോകത്ത് ഏറ്റവും കൂടുതല്‍ കള്ളപ്പണമുള്ളത് ഡോളറിലാണ്. നോട്ടു നിരോധിച്ചതില്‍ ലോകരാജ്യങ്ങള്‍ ഇന്ത്യയെ നോക്കി ചിരിക്കുകയാണെന്നും ചിദംബരം പരിഹസിച്ചു.