അമ്പലപ്പുഴ: ദേവസ്വം ബോര്‍ഡിനു കീഴിലെ ക്ഷേത്രങ്ങളില്‍ വന്‍ അഴിമതി നടക്കുന്നതായി പരാതി.
നിയമാനുസൃതമായി ക്വട്ടേഷന്‍ നല്‍കാതെ ക്ഷേത്രങ്ങളില്‍ ഉത്സവങ്ങള്‍ക്ക് ആവശ്യമായ ലൈറ്റ് ആന്‍ഡ് സൗണ്ട്‌സ്, പന്തല്‍ തുടങ്ങിയവയുടെ കരാര്‍ അട്ടിമറിച്ച് വന്‍തുക ക്ഷേത്ര കമ്മിറ്റിയംഗങ്ങള്‍ കമ്മിഷന്‍ വാങ്ങി ടെന്‍ഡര്‍ അട്ടിമറിക്കുന്നതായാണ് പരാതി. നിരവധി പരാതികള്‍ ദേവസ്വം ഓഫിസര്‍ക്ക് ലഭിച്ചിട്ടുണ്ടെങ്കിലും പൊതുജനങ്ങളില്‍ നിന്നു ഫണ്ട് പിരിവ് നടത്തി ഉത്സവങ്ങള്‍ നടത്തുന്നതിനാല്‍ ഈ വിഷയത്തില്‍ ഇടപെടാന്‍ സബ് ഗ്രൂപ്പ് ഓഫിസറും തയാറായിട്ടില്ല.
എന്നാല്‍ പരാതിയുണ്ടായ ക്ഷേത്രങ്ങളിലെ സെക്രട്ടറിയെയും പ്രസിഡന്റിനെയും അഴിമതിയെ കുറിച്ച് അറിയിച്ചിരുന്നു.
അമ്പലപ്പുഴ ദേവസ്വത്തിനു കീഴിലെ ഒരു ക്ഷേത്രത്തില്‍ സബ് ഗ്രൂപ്പ് ഓഫിസര്‍ ഫോണില്‍ ബന്ധപ്പെട്ട് മൈക്ക് സെറ്റിനും പന്തലിനും ക്വട്ടേഷന്‍ നല്‍കുവാന്‍ നിര്‍ദേശം നല്‍കിയിട്ടും പന്തലിനു മാത്രം ക്വട്ടേഷന്‍ നല്‍കി മൈക്ക് സെറ്റിന് വന്‍ തുക കമ്മിഷനായി സെക്രട്ടറിയും പ്രസിഡന്റും സ്വന്തമാക്കിയതായും ആക്ഷേപമുണ്ട്.
നിയമ പ്രകാരം മൈക്ക് സെറ്റിന്റെ കരാര്‍ ദേവസ്വം ബോര്‍ഡിനു കീഴിലെ ക്ഷേത്രങ്ങളിലേക്കു നല്‍കുമ്പോള്‍ സ്ഥാപന ഉടമയ്ക്കു വയര്‍മാന്‍ ലൈസന്‍സ് നിര്‍ബന്ധമാണ്. എന്നാല്‍ ലൈസന്‍സ് പോലുമില്ലാത്തവര്‍ക്കു കരാര്‍ മറിച്ചു നല്‍കുന്നതായും ആക്ഷേപം ഉയരുന്നുണ്ട്.