ബെര്‍ലിന്‍: ജര്‍മനിയിലെ ബെര്‍ലിനെ മാര്‍ക്കറ്റിലേക്ക് ലോറി ഇടിച്ചു കയറി 12 പേര്‍ കൊല്ലപ്പെട്ടു. സംഭവത്തില്‍ 45 പേര്‍ക്ക് പരുക്കേറ്റു. കെയ്‌സര്‍ വില്‍ഹം പള്ളിക്ക് സമീപത്തുള്ള മാര്‍ക്കറ്റിലാണ് സംഭവം. 

അതിവേഗത്തിലെത്തിയ ലോറി ആളുകള്‍ക്കുമേല്‍ പാഞ്ഞുകയറുകയായിരുന്നുവെന്നാണു ദൃക്‌സാക്ഷി മൊഴി. ലോറി ഡ്രൈവറെ പൊലിസ് അറസ്റ്റ് ചെയ്തതായി റിപോര്‍ട്ടുണ്ട്. ഡ്രൈവര്‍ക്കൊപ്പമുള്ള ആള്‍ കൊല്ലപ്പെട്ടു. മുന്‍കൂട്ടി തയ്യാറാക്കിയ പദ്ധതി പ്രകാരമാണ് ആക്രമണമെന്നാണ് പൊലിസിന്റെ പ്രാഥമിക നിഗമനം.മരണസംഖ്യ ഇനിയും ഉയരാനാണ് സാധ്യതയെന്ന് പൊലിസ് അറിയിച്ചു.

ബെര്‍ലിനിലെ അതിപുരാതനമായ ദേവാലയമാണ് കെയ്‌സര്‍ വില്‍ഹം. ഭീകരാക്രമണ സാധ്യത തള്ളികളയാനാവില്ലെന്നും പൊലിസ് വൃത്തങ്ങള്‍ സൂചിപ്പിച്ചു.

കഴിഞ്ഞ ജൂലൈയില്‍ ഫ്രാന്‍സിലെ നീസില്‍ ജനക്കൂട്ടത്തിനിടയിലേക്ക് ട്രക്ക് ഓടിച്ചുകയറ്റിയ ഭീകരാക്രമണത്തില്‍ 86 പേരാണ് കൊല്ലപ്പെട്ടിരുന്നു. ആക്രമണത്തിന്റെ ഉത്തരവാദിത്തം ഇസ്‌ലാമിക് സ്റ്റേറ്റ് ഏറ്റെടുത്തിരുന്നു.