കല്‍പ്പറ്റ: പ്രകൃതി സൗഹൃദത്തിനു പുതുമാതൃക തീര്‍ത്ത് എം.എസ്.എഫ് ജില്ലാ ലീഡേഴ്‌സ് ക്യാംപ് 'ഉണര്‍വി'ന് 23ന് വെള്ളമുണ്ട കിണറ്റിങ്ങലില്‍ തുടക്കമാകും. പരിസ്ഥിതിക്കു ഹാനികരമായ വസ്തുക്കളുടെ ഉപയോഗം പൂര്‍ണമായും ഒഴിവാക്കി വിദ്യാര്‍ഥി സംഘടനകള്‍ക്കു പുതുമാതൃക തീര്‍ത്താണ് ക്യാംപ് നടക്കുന്നത്.
പരിസ്ഥിതി സംരക്ഷണത്തിനു പ്രാധാന്യംനല്‍കി പ്രചാരണ നോട്ടിസുകളില്‍ ഫഌക്‌സ് ബോര്‍ഡുകള്‍ പൂര്‍ണമായും ഒഴിവാക്കി. ക്യാംപ് ദിവസങ്ങളില്‍ ഭക്ഷണത്തിനുള്‍പ്പെടെ ഉപയോഗിക്കുന്ന വസ്തുക്കള്‍ പ്ലാസ്റ്റിക് മുക്തമാക്കും. വിദ്യാര്‍ഥികളില്‍ പരിസ്ഥിതി സൗഹൃദം, മിതവ്യയം തുടങ്ങിയ സന്ദേശങ്ങള്‍ കൈമാറുക എന്ന ലക്ഷ്യത്തോടെ നടത്തുന്ന പരിപാടിയോടനുബന്ധിച്ചു പരിസര ശുചീകരണവും പ്രദേശത്തു ബോധവല്‍ക്കരണവും നടത്തും.
23നു വൈകിട്ട് അഞ്ചിനു പതാക ഉയര്‍ത്തുന്നതോടെ ക്യാംപിനു തുടക്കമാകും. യൂത്ത്‌ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ് ഉദ്ഘാടനം ചെയ്യും. വിവിധ സെഷനുകളില്‍ കെ.എം ഷാജി എം.എല്‍.എ, എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍, ജനറല്‍ സെക്രട്ടറി എം.പി നവാസ്, പിണങ്ങോട് അബൂബക്കര്‍, ഇബ്രാഹിം ഫൈസി റിപ്പണ്‍, റാഷിദ് ഗസാലി കൂളിവയല്‍, ബാസിം ഗസാലി സംസാരിക്കും.
മുസ്‌ലിംലീഗ് ജില്ലാ പ്രസിഡന്റ് പി.പി.എ കരീം, ജനറല്‍ സെക്രട്ടറി കെ.കെ അഹമ്മദ് ഹാജി, യൂത്ത് ലീഗ് സംസ്ഥാന വൈസ് പ്രസിഡന്റ് പി. ഇസ്മാഈല്‍, സംസ്ഥാന സെക്രട്ടറി പി.ജി മുഹമ്മദ്, ജില്ലാ ജനറല്‍ സെക്രട്ടറി സി.കെ ആരിഫ് സംബന്ധിക്കും.