കൊച്ചി: മുഖ്യമന്ത്രിക്കുവേണ്ടി നിയമോപദേഷ്ടാവിനെ നിയമിക്കുന്നത് ഭരണഘടനാ വിരുദ്ധമാണെന്നാരോപിച്ച് ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരന്‍ നല്‍കിയ ഹരജിയില്‍ നോട്ടീസ് അയക്കാന്‍ ഹൈക്കോടതി ഉത്തരവിട്ടു.
മുഖ്യമന്ത്രി പിണറായി വിജയനടക്കമുള്ള എതിര്‍കക്ഷികള്‍ക്ക് നോട്ടീസ് നല്‍കാനാണ് ഹൈക്കോടതി നിര്‍ദേശിച്ചത്. മുഖ്യമന്ത്രിക്കുവേണ്ടി നിയമോപദേഷ്ടാവിനെ നിയമിക്കുന്നത് അഡ്വ. ജനറലിന്റെ അധികാരത്തെ മറികടക്കുന്ന നടപടിയാണെന്നും ഇങ്ങനെയൊരു പദവി സൃഷ്ടിച്ചാണ് എം.കെ ദാമോദരനെ നിയമിച്ചതെന്നും ഹരജിക്കാരന്‍ ചൂണ്ടിക്കാട്ടിയിരുന്നു.
എം.കെ ദാമോദരന്‍ സ്ഥാനം ഏറ്റെടുത്തില്ലെങ്കിലും ഇത്തരമൊരു പദവിയുടെ നിയമസാധുത പരിഗണിക്കണമെന്നും ഹരജിക്കാരന്‍ ആവശ്യപ്പെട്ടു.
തുടര്‍ന്നാണ് കേസില്‍ എതിര്‍കക്ഷികളായ സംസ്ഥാന സര്‍ക്കാര്‍, മുഖ്യമന്ത്രി പിണറായി വിജയന്‍, അഡ്വ. ജനറല്‍, നിയമവകുപ്പു സെക്രട്ടറി, പൊതുഭരണ വകുപ്പ് സെക്രട്ടറി, ബാര്‍ കൗണ്‍സില്‍ ഒഫ് ഇന്ത്യ എന്നിവര്‍ക്ക് നോട്ടീസ് നല്‍കാന്‍ നിര്‍ദേശിച്ചത്. പ്രതിപക്ഷ നേതാവ് രമേശ് ചെന്നിത്തലയെയും കേസില്‍ എതിര്‍കക്ഷിയാക്കിയിട്ടുണ്ടെങ്കിലും അദ്ദേഹത്തിന് നോട്ടീസ് നല്‍കേണ്ടെന്ന് ഹൈക്കോടതി വ്യക്തമാക്കിയിട്ടുണ്ട്.
ഹൈക്കോടതിയിലെ അഭിഭാഷകനായ അഡ്വ.എംകെ ദാമോദരനെ മുഖ്യമന്ത്രിയുടെ നിയമോപദേഷ്ടാവായി നിയമിക്കുന്നതിനെ ചോദ്യം ചെയ്യുന്ന ഹരജിയില്‍ താന്‍ പദവി ഏറ്റെടുക്കാനില്ലെന്നും കേസിലെ കക്ഷികളുടെ പട്ടികയില്‍ നിന്ന് ഒഴിവാക്കണമെന്നും അഡ്വ.എംകെ ദാമോദരന്‍ വ്യക്തമാക്കിയതിനെ തുടര്‍ന്ന് അദ്ദേഹത്തെ ഒഴിവാക്കി.