വടക്കാഞ്ചേരി: ക്രിസ്തുമസ് നവവത്സര കാലത്ത് പൊതുവിപണിയിലെ ഭക്ഷ്യവസ്തുക്കളുടേയും അവശ്യസാധനങ്ങളുടേയും പൂഴ്ത്തിവയ്പ് തടയുന്നതിനും അമിത വില ഈടാക്കുന്നതിനുമെതിരേ കര്‍ശന നടപടി സ്വീകരിക്കുന്നതിന് ജില്ലാ കലക്ടറുടെ നിര്‍ദേശാനുസരണം കടകളില്‍ മിന്നല്‍ പരിശോധന.
സിവില്‍ സപ്ലൈസ് വകുപ്പ്, ലീഗല്‍ മെട്രോളജി, റവന്യൂ, പൊലിസ് എന്നീ വകുപ്പുകള്‍ സംയുക്തമായാണ് പരിശോധന നടത്തിയത്. കുന്നംകുളം മേഖലയിലായിരുന്നു പരിശോധന നടന്നത്. ഇരുപതോളം വ്യാപാര സ്ഥാപനങ്ങളില്‍ നടന്ന പരിശോധനയില്‍ നാലിടങ്ങളില്‍ വലിയ ക്രമക്കേട് കണ്ടെത്തി. ഈ സ്ഥാപനങ്ങളില്‍ നിന്ന് 11,000 രൂപ പിഴ ഈടാക്കി. അളവ് തൂക്കത്തില്‍ വ്യത്യാസം വരുത്തുക, ഉപകരണങ്ങള്‍ സീല്‍ ചെയ്യാതെ ഉപയോഗിക്കുക, നിയമാനുസൃതമല്ലാത്ത ഭക്ഷ്യവസ്തുക്കള്‍ പായ്ക്ക് ചെയ്ത് വില്‍പന നടത്തുക, വിലവിവരപട്ടിക സ്റ്റോക്ക് വിവരം എന്നിവ പ്രദര്‍ശിപ്പിക്കാതിരിക്കുക, മതിയായ ലൈസന്‍സുകള്‍ ഇല്ലാതെ പ്രവര്‍ത്തിക്കുക തുടങ്ങിയ കാരണങ്ങള്‍ ശ്രദ്ധയില്‍പെട്ടാല്‍ കര്‍ശന നടപടി സ്വീകരിക്കുമെന്ന് താലൂക്ക് സപ്ലൈ ഓഫിസര്‍ ടി.അയ്യപ്പദാസ് അറിയിച്ചു.
പരിശോധനക്ക് റേഷനിങ് ഇന്‍സ്‌പെക്ടര്‍ എം.എസ് പോള്‍സണ്‍, കെ.വി വിനേഷ്, ലീഗല്‍ മെട്രോളജി ഇന്‍സ്‌പെക്ടര്‍ ബി.സി അലന്‍സ്, ഇന്‍സ്‌പെക്ടിങ് അസിസ്റ്റന്റ് എം.കെ സുരേന്ദ്രന്‍, സിവില്‍ പൊലിസ് ഓഫിസര്‍ ടി.രതീഷ് എന്നിവര്‍ നേതൃത്വം നല്‍കി.