കൊച്ചി:സോളാര്‍ തട്ടിപ്പുമായി ബന്ധപ്പെട്ട് പ്രതിപക്ഷം തനിക്കെതിരേ നിയമസഭയ്ക്കകത്തും പുറത്തും ഉന്നയിച്ച ആരോപണങ്ങള്‍ അടിസ്ഥാനരഹിതമാണെന്ന് എസ്.ഐ.ടി (പ്രത്യേക അന്വേഷണ സംഘം) യുടെ അന്വേഷണത്തില്‍ തെളിഞ്ഞതാണെന്ന് മുന്‍മുഖ്യമന്ത്രി ഉമ്മന്‍ചാണ്ടി. സോളാര്‍ വിവാദവുമായി ബന്ധപ്പെട്ട് സെക്രട്ടറിയേറ്റിലെയും തന്റെ മുറിയിലെയും സി.സി.ടി.വി  ദൃശ്യങ്ങള്‍ നശിപ്പിച്ചെന്നായിരുന്നു പ്രതിപക്ഷത്തിന്റെ ആരോപണം. എന്നാല്‍ 2006ല്‍ എല്‍.ഡി.എഫ് സര്‍ക്കാരിന്റെ കാലത്ത് സ്ഥാപിച്ച സി.സി.ടി.വി കാമറയ്ക്ക് ദൃശ്യങ്ങള്‍ സൂക്ഷിക്കാന്‍ 14 ദിവസം മാത്രമെ കഴിയൂ എന്ന് അന്വേഷണത്തില്‍ തെളിഞ്ഞിട്ടുണ്ട്.
തന്റെ ഔദ്യോഗിക വസതിയിലും സെക്രട്ടറിയേറ്റിലും ടീം സോളാറിന്റെ പാനല്‍ സ്ഥാപിച്ചെന്നായിരുന്നു മറ്റൊരു ആരോപണം. എന്നാല്‍ ഔദ്യോഗിക വസതിയിലേത് അനെര്‍ട്ടും സെക്രട്ടറിയേറ്റിലേത് സി ഡിറ്റുമാണ് സ്ഥാപിച്ചതെന്ന് അന്വേഷണത്തില്‍ തെളിഞ്ഞിട്ടുണ്ടെന്നും മുന്‍ മുഖ്യമന്ത്രി ഉമ്മന്‍ചാണ്ടി പറഞ്ഞു.