പെരുമ്പടപ്പ്: വില്‍പനയ്‌ക്കെത്തിച്ച രണ്ടു കിലോ കഞ്ചാവുമായി യുവാവ് അറസ്റ്റില്‍. പാലക്കാട് വല്ലഞ്ചിറ അമ്പാട്ട് അഭിലാഷി (23) നെയാണ് പൊന്നാനി സി.ഐ എ.ജെ ജോണ്‍സണ്‍, പെരുമ്പടപ്പ് എസ്.ഐ രാജേന്ദ്രന്‍ നായര്‍ എന്നിവരുടെ നേതൃത്വത്തില്‍ അറസ്റ്റ് ചെയ്തത്.
ഇന്നലെ പെരുമ്പടപ്പ് പാറയിലെ പെട്രോള്‍ പമ്പിനു സമീപത്തുവച്ചാണ് അഭിലാഷ് പിടിയിലായത്. പാലക്കാട്ടുനിന്നു ബൈക്കിലാണ് അഭിലാഷ് വന്നത്. വെളിയങ്കോടുള്ള ഏജന്റിനു കൊടുക്കാനാണ് കഞ്ചാവ് കൊണ്ടുവന്നത്. രഹസ്യവിവരം ലഭിച്ച പൊലിസ് അഭിലാഷിനെ പിന്തുടര്‍ന്നു പിടികൂടുകയായിരുന്നു. തമിഴ്‌നാട് അതിര്‍ത്തിയില്‍നിന്നു കൈമാറിക്കിട്ടുന്ന കഞ്ചാവാണ് വെളിയങ്കോട്ടേക്കു കൊണ്ടുപോയിരുന്നത്. ഒരു വര്‍ഷത്തോളമായി അഭിലാഷ് തീരമേഖലയിലേക്കു കഞ്ചാവെത്തിക്കുന്നുണ്ട്.
2012ല്‍ എറണാകുളത്തെ പമ്പില്‍നിന്ന് അഞ്ചര ലക്ഷം രൂപ തട്ടിയതുള്‍പ്പെടെ 19 കേസുകളില്‍ അഭിലാഷ് പ്രതിയാണെന്നു പൊലിസ് പറഞ്ഞു. ഇതില്‍ 16 കേസ് പിടിച്ചുപറിയും ഒരെണ്ണം ബൈക്ക് മോഷണവുമാണ്.
തീരമേഖലയില്‍ അഭിലാഷില്‍നിന്നു കഞ്ചാവ് വാങ്ങുന്ന ഏജന്റുമാരെക്കുറിച്ച് അന്വേഷണം ഊര്‍ജിതമാക്കിയിട്ടുണ്ട്. പ്രതിയെ ഇന്നു കോടതിയില്‍ ഹാജരാക്കും. വരും ദിവസങ്ങളില്‍ മേഖലയില്‍ കഞ്ചാവ് മാഫിയയ്‌ക്കെതിരേ അന്വേഷണം ശക്തമാക്കുമെന്ന് എസ്.ഐ രാജേന്ദ്രന്‍ നായര്‍ പറഞ്ഞു.