മുഹമ്മ: പട്ടാപ്പകല്‍ ലോട്ടറിത്തൊഴിലാളിയുടെ കയ്യില്‍ നിന്ന് പണം പിടിച്ചുപറിച്ച് ഓടി രക്ഷപ്പെടാന്‍ ശ്രമിച്ച തമിഴ്‌നാട് സ്വദേശിയെ നാട്ടുകാര്‍ പിടികൂടി പൊലീസില്‍ ഏല്‍പ്പിച്ചു.
തഞ്ചാവൂര്‍ സ്വദേശി രവിചന്ദ്രനാ(50)ണ് പിടിയിലായത്. ഇന്നലെ ഉച്ചയ്ക്കുശേഷമായിരുന്നു സംഭവം. ലോട്ടറി തൊഴിലാളിയായ കഞ്ഞിക്കുഴി പഞ്ചായത്ത് 13ാം വാര്‍ഡ് നമ്പിയത്ത് ശേരി പവിത്രന്റെ കൈവശമിരുന്ന പണമാണ് പിടിച്ചുപറിച്ചത്. കഞ്ഞിക്കുഴി ചന്തയ്ക്ക് സമീപം വച്ച് പവിത്രന്‍ നോട്ട് എണ്ണുന്നതിനിടെ പണം തട്ടിയെടുക്കുകയായിരുന്നു. 1000 രൂപയാണ് അപഹരിക്കപ്പെട്ടത്. പണം തട്ടി ഓടി രക്ഷപ്പെടാന്‍ ശ്രമിച്ച രവിചന്ദ്രനെ നാട്ടുകാരാണ് പിന്തുടര്‍ന്ന് പിടികൂടിയത്. തുടര്‍ന്ന് മാരാരിക്കുളം പൊലീസില്‍ വിവരമറിയിക്കുകയായിരുന്നു. പരാതിയുടെ അടിസ്ഥാനത്തില്‍ പൊലീസ് കേസെടുത്തു.