ബദിയഡുക്ക: നിയന്ത്രണം വിട്ട കാര്‍ ആള്‍ക്കൂട്ടത്തിലേക്കു പാഞ്ഞു കയറി കാല്‍നടയാത്രക്കരായ മൂന്നു പേര്‍ക്കു പരുക്ക്. ആറട്ട്കടവിലെ മുഹമ്മദിന്റെ മകള്‍ സഫിയ(15), നഫീസയുടെ മകള്‍ നജിയ(13), പള്ളത്തുമൂലയിലെ ഉമ്പുവിന്റെ മകള്‍ റാഹില(14)എന്നിവര്‍ക്കാണു പരുക്കേറ്റത്.
ഗുരുതരമായി പരുക്കേറ്റ സഫിയയെ മംഗളൂരുവിലെ സ്വകാര്യാശുപത്രിയില്‍ പ്രവേശിപ്പിച്ചു. മറ്റുള്ളവരെ കാസര്‍കോട്ടെ സ്വകാര്യാശുപത്രിയിലും പ്രവേശിപ്പിച്ചു. കഴിഞ്ഞ ദിവസം രാത്രി എട്ടരയോടെ ബദിയടുക്ക മാവിനക്കട്ടയിലാണു സംഭവം. പിലങ്ങട്ട മസ്ജിദില്‍ നടക്കുന്ന മതപ്രസംഗ പരമ്പരയില്‍ സംബന്ധിക്കുന്നതിനു പോകുകയായിരുന്ന കുടുംബമാണ് അപകടത്തില്‍പെട്ടത്.
ആള്‍ക്കൂട്ടത്തിലേക്കു മുള്ളേരിയ ഭാഗത്തു നിന്നു വരികയായിരുന്ന സിഫ്റ്റ് കാര്‍ നിയന്ത്രണം വിട്ടു പാഞ്ഞു കയറുകയായിരുന്നു. അപകടത്തിനിരയക്കിയ മൗവ്വാര്‍ മുക്കൂര്‍ സ്വദേശി ഇബ്രാഹിം ഹാജിയുടെ കാര്‍ പൊലിസ് കസ്സഡിയിലെടുത്തു.